Qazaqstan fýtbol federasıasynyń Baqylaý, tártiptik jáne etıka komıteti (BTEK) Petropavldyń «Qyzyljary» men Óskemenniń «Altaıy» arasyndaǵy mach boıynsha sheshim qabyldady, dep habarlaıdy infohub.kz.
21-týr aıasyndaǵy kezdesý 8 tamyzda Óskemende ótip, 2:2 esebimen teń aıaqtaldy.
Bul machta «Qyzyljar» sapynda ýkraınalyq jartylaı qorǵaýshy Aleksandr Noıok oınady. Alaıda ol 21-týrdyń basqa machynda — «Aqtóbege» qarsy «Atyraý» quramynda da alańǵa shyqqan. Bul kezdesý keıinge shegerilip, 17 mamyrda ótken bolatyn.
BTEK muny reglamentti buzý dep baǵalady. Nátıjesinde «Qyzyljarǵa» 0:3 esebimen tehnıkalyq jeńilis berildi.
Petropavl klýby mundaı sheshimmen kelispeıtinin bildirdi. Onda «árqashan Fair Play qaǵıdattaryn, adal sporttyq kúresti jáne jarys reglamentine qurmetti ustanatyndaryn» málimdedi.
«Biz klýbymyz tarapynan eshqandaı zańsyz nemese quqyqqa qaıshy áreketter jasalmaǵanyna senimdimiz, al barlyq prosedýralyq qadamdar tek adal jáne ashyq túrde oryndaldy», — delingen «Qyzyljar» málimdemesinde.
Petropavl klýby jaqyn arada «tıisti quqyqtyq sharalardy» qoldanýǵa nıetti.