Reseı prezıdentiniń baspasóz hatshysy Dmıtrı Peskov Ýkraınadaǵy janjaldaǵy jeńis "óte jaqyn" ekenin jáne áskerı qımyldardyń sátti ótip jatqanyna senimdi ekenin málimdedi, dep habarlaıdy infohub.kz saıty.
BRIKS samıti qarsańynda jýrnalıserge arnalǵan brıfıńte sóılegen Peskov: "Biz jeńis (Ýkraınadaǵy janjalda - red.) óte jaqyn ekenine senimdimiz. Biz áskerı áleýetimizge, áskerı qımyldarymyzǵa óte senimdimiz, olar óte sátti ótip jatyr", - dep atap ótti.
Onyń aıtýynsha, eger Kıev bıligi qıyn sheshimderge daıyn bolsa, janjal áldeqaıda erte aıaqtalýy múmkin edi. "Eger Kıevte jaýapkershilikti óz moınyna alyp, óte qıyn sheshimder qabyldaıtyn bireý tabylsa, soǵys áldeqashan aıaqtalýy múmkin edi", - dep qosty ol.
Eske salaıyq, ótken demalys kúnderi AQSH-tyń arnaıy ókili Stıv Ýıtkoff pen Aq úıdiń keńesshisi Djared Kýshner Máskeýge baryp, Reseı kóshbasshysy Vladımır Pýtınmen kelissózder júrgizdi. Keıin olar Ýkraına prezıdenti Vladımır Zelenskımen kezdesti. Osydan keıin Ýıtkoff Zelenskı, Pýtın jáne Tramp qatysatyn yqtımal kelissózder týraly pikir bildirdi.