«Qazaqstan temir joly» ulttyq kompanıasy (QTJ) qor naryǵyna shyǵý aıasynda 5 mıllıard dollarǵa deıin tartýdy kózdep otyr. Bul rette kompanıanyń jalpy quny 30 mıllıard dollarǵa deıin baǵalanýy múmkin. Bul týraly Gonkongtyń etnet qarjylyq basylymy habarlady, oǵan Qazaqstandyq mınorıtarlyq aksıonerler qaýymdastyǵy (QAMS) nazar aýdardy, dep jazady infohub.kz saıty.
Kompanıa óz aksıalarynyń 20%-ǵa deıingi bóligin ornalastyrýy múmkin. QTJ baǵaly qaǵazdarynyń lıstıńi qazan aıynda bastalýy yqtımal, alaıda alǵashqy jarıa ornalastyrýdy (IPO) 2027 jylǵa shegerý nusqasy da joqqa shyǵarylmaıdy. Basylym satylatyn pakettiń mólsherin naqtylamaǵan, degenmen buǵan deıin buqaralyq aqparat quraldary 20% aksıa úlesi týraly jazǵan bolatyn.
Eske salaıyq, QTJ baǵaly qaǵazdaryn AIX (Qazaqstan), LSE (London) jáne Gonkong qor bırjasynda ornalastyrýdy josparlap otyr. Investorlardan tartylǵan qarajatty ulttyq kompanıa qaryzdy óteýge jáne ınvestısıalyq jobalardy iske asyrýǵa jumsaıdy.
Alaıda kompanıanyń josparlanǵan baǵasy kásibı qaýymdastyqta eleýli kúmán týdyryp otyr. QAMS silteme jasaǵan Bloomberg agenttiginiń dereginshe, QTJ-nyń jalǵyz aksıoneri – «Samuryq-Qazyna» ulttyq ál-aýqat qorynyń – jáne táýelsiz ınvestısıalyq bankterdiń baǵalaýy aıtarlyqtaı ózgeshe.
Sonymen qatar QTJ qaryzdarǵa batqan. Buǵan deıin QAMS kompanıanyń kredıttik kelisimde belgilengen qaryz júktemesi deńgeıinen (Gearing Ratio) asyp ketkenine nazar aýdarǵan.
Qaýymdastyqtyń pikirinshe, basty ashyq suraq – qaryzy joǵary jáne bıznesi qaıta baǵalanýy múmkin kompanıanyń IPO-syna áleýetti ınvestorlardyń qalaı qaraıtyny. Ásirese Air Astana tájirıbesi aıasynda (áýe tasymaldaýshysynyń 41,18% aksıasy «Samuryq-Qazynaǵa» tıesili), onyń aksıalary IPO baǵasyna shamamen 40% jeńildikpen saýdalanyp otyr.
Buǵan deıin «Kýrsıv» QTJ 2025 jyldyń qorytyndysy boıynsha taza paıdasyn eki eseden astam ulǵaıtyp, 343,6 mlrd teńgege jetkizgenin jazǵan bolatyn, bir jyl buryn bul kórsetkish 160,8 mlrd teńge edi.