Premer-mınıstr Oljas Bektenov strategıalyq nysandardyń qurylysyn sozyp jatqan energetıka salasynyń basshylaryn, sondaı-aq tranzıttik tasymaldar josparyn oryndamaǵan «Qazaqstan temir joly» (QTJ) kompanıasyn qatań synǵa aldy. Premer-mınıstr Almatydaǵy jylý elektr ortalyqtary men Túrkistan oblysyndaǵy bý-gaz qondyrǵysy merziminde iske qosylmasa, jaýapkershilik jeke qaralatynyn eskertti, dep habarlaıdy infohub.kz.
Úkimet otyrysynda mınıstrlerdiń esepterin tyńdaǵan Bektenov birqatar saladaǵy kórsetkishterdiń qanaǵattanarlyqsyz ekenin atap ótti. Metalýrgıada óndiris kólemi 2,7%-ǵa, tústi metalýrgıada 6%-ǵa tómendegen. Oǵan negizgi sebep — altyn óndirýdiń azaıýy.
Premer-mınıstr Ónerkásip jáne qurylys mınıstrligine bir aı ishinde salany qoldaýdyń qosymsha tetikterin ázirleýdi tapsyrdy. Sondaı-aq «Taý-Ken Samýryq» kompanıasymen birlesip, otandyq kásiporyndardyń tolyq júktelýin qamtamasyz etý qajet. Onyń ishinde Qazaqstanda ımporttyq altyndy affınajdaý múmkindigin paıdalaný kózdelgen.
Úkimet basshysy energetıkadaǵy ahýalǵa erekshe nazar aýdardy. Energetıka mınıstrligine jer qoınaýyn paıdalanýshylarmen munaı men gaz óndirý josparlaryn oryndaý boıynsha kelissózder júrgizý, kómirdi tereń óńdeý jobalaryna jeke ınvestısıalardy tartýdy jedeldetý jáne jańa energıa nysandaryn ýaqtyly iske qosýdy qamtamasyz etý tapsyryldy.
«Energetıka mınıstrligi men "Samuryq-Qazyna" qory basshylary Almatydaǵy JEO-2 men JEO-3, sondaı-aq Túrkistan oblysyndaǵy bý-gaz qondyrǵysyn ýaqtyly iske qosýǵa jeke jaýapty ekenin eskertemin», — dedi Oljas Bektenov.
Premer-mınıstr ótken aptada júrgizilgen tekserý Almatydaǵy JEO-3 qurylysynyń baıaý júrip jatqanyn kórsetkenin aıtty. «JEO-3 boıynsha jumys belsendi emes. Jyl sońyna deıin tıisti sharalar qabyldanbasa, jeke jaýapkershilik máselesi qaralady. Bul máseleni qatań baqylaýda ustańyzdar», — dep atap ótti ol.
Kólik salasy da synnan tys qalmady. Bektenov QTJ jumysyn jetkilikti tıimdi emes dep baǵalady. Kompanıaǵa tranzıttik temirjol tasymaldaryn damytý josparyn oryndaý, negizgi temirjol jelileriniń qurylysyn aıaqtaý jáne vokzaldardy jańǵyrtýdy jyl sońyna deıin aıaqtaý tapsyryldy.
Úkimet basshysy óńirler arasyndaǵy saýda kóleminde aıtarlyqtaı teńgerimsizdik bar ekenin atap ótti: taýar aınalymynyń 70%-y nebári bes óńirge tıesili. Osyǵan baılanysty ákimderge bir aı ishinde saýdany damytýdyń jol kartalaryn daıyndaý tapsyryldy. Olarda basym ınvestısıalyq jobalar, shekara mańy aımaqtary, týrısik óńirler jáne arnaıy ekonomıkalyq aımaqtardyń áleýeti erekshe eskerilýi kerek.
Eske sala keteıik, Oljas Bektenov maýsym aıynda QTJ basshylyǵyna tranzıttik tasymaldar josparyn oryndamaǵany úshin jeke jaýapkershilik bolatynyn eskertken edi. Ótken aptada kompanıanyń basqarma tóraǵasy Talǵat Aldybergenov qyzmetinen ketip, QTJ basshysynyń mindetin ýaqytsha atqarý Baýyrjan Orynbasarovqa júkteldi.