Qytaıdyń Sychýan provınsıasynda banket kezinde qabyrǵa qulap, bes adam qaza taýyp, taǵy 17 adam jaraqat aldy, dep habarlaıdy infohub.kz.
Oqıǵa 18 tamyzda Channın ýeziniń aýylynda bolǵan. Xinhua agenttiginiń habarlaýynsha, apatqa qabyrǵaǵa bekitilgen jańbyrdan qorǵaıtyn ýaqytsha shatyrda sýdyń jınalýy sebep bolǵan. Artyq qysymnan qurylymdy ustap turǵan arqandar tartylyp, qabyrǵa qonaqtardyń ústine qulaǵan.
Jergilikti tótenshe jaǵdaılar basqarmasynyń málimetinshe, aýyl turǵyny aýlasynda dastarqan jaıǵan. Kenetten shatyrǵa tirek bolǵan qabyrǵa qulap, úsh adam oqıǵa ornynda qaza tapqan, taǵy ekeýi aýrýhanada alǵan jaraqatynan kóz jumǵan.
Qazir 17 jaraqattanǵan adam dárigerlerdiń baqylaýynda, olarǵa qajetti medısınalyq kómek kórsetilýde. Jergilikti bılik oqıǵanyń mán-jaıyn anyqtap jatyr.