Австралиялық Lindian Resources компаниясы Степногорскідегі бұрын «Қазатомпромға» тиесілі болған зауытты дамытуға 150 миллион доллар салуға ниетті. Бұған дейін қазақстандық оператор мен жапондық Sumitomo корпорациясына тиесілі болған кәсіпорын австралиялық иесінің қол астында жаңа қуатқа ие болады: Silkway Metals еншілес құрылымы арқылы қазіргі өндірісті жаңғыртып, жаңа цех салу жоспарланып отыр, деп хабарлайды infohub.kz сайты.
Ақмола облысы әкімдігінің мәліметінше, жоба 2026–2028 жылдарға арналған, ал дайындық жұмыстары қазірдің өзінде басталып кеткен. Шамамен 50 миллион доллар қолданыстағы кәсіпорынды жаңартуға, тағы 100 миллион доллар жаңа цех салуға жұмсалады.
Жаңа цехта сирек кездесетін металдардың аралас карбонатын өндіру жоспарланып отыр. Бұл — тұрақты магниттер жасауға арналған материалдарға одан әрі қайта өңделетін аралық өнім.
«Жаңа өндірістің жобалық қуаты жылына 12,5 мың тоннаны құрайды, ал жоспарланған шығарылым — жылына 8 мың тонна. Компания 228 жұмыс орнын сақтап қалады және жаңа қуаттар жобалық деңгейге шыққан соң қосымша жұмыс орындарын ашады», — деп хабарлады әкімдікте.
Silkway Metals 2026 жылдың тамызында Lindian Resources-тың еншілес компаниясына айналғаны австралиялық топтың жылдық есебінде айтылған. Lindian Степногорскідегі SARECO зауыт кешенінің және онымен байланысты инфрақұрылымның 100%-ын 20 миллион долларға дейінгі сомаға сатып алды. Соңғы төлем 4 қыркүйекте төленді. Мәмілеге өндірістік активтер, жабдық, жер және ғимараттар кірді.
Lindian Resources — акциялары Австралия қор биржасында саудаланатын жария компания. Ірі акционерлерінің қатарында Regal Funds Management пен L1 Capital бар.
Ақмола облысының әкімі Марат Ахметжанов Silkway Metals-тің бас директоры Дінмұхаммед Маджановпен кездесті. Олар жобаның барысын, қоғамдық тыңдауларды, өндірістік және әлеуметтік мәселелерді талқылады.
«Степногорскіде мұндай жобаны жүзеге асыру үшін қажетті жағдайлар бар – электр және жылумен жабдықтаудың жеткілікті қуаты, сондай-ақ дамыған өндірістік инфрақұрылым. Жақында қалада индустриялық аймақ ашылып, ол өндірістерді орналастыру мен дамытуға қосымша мүмкіндіктер туғызып отыр», – деді Марат Ахметжанов.
Әкімнің айтуынша, жоба Қазақстанның ресурстарын тиімді пайдалану және критик минералдар саласын дамыту туралы президенттің тапсырмасына сай келеді. Облыс әкімдігі оны іске асырудың барлық кезеңінде сүйемелдейтін болады.
Бұған дейін «Курсив» «Қызылту» компаниясы («Степногорск тау-кен химия комбинатының» еншілесі, түпкі иесі — ресейлік «Росатом» мемлекеттік корпорациясы) Ақмола облысының Ерейментау ауданында алтын барлауға құқық алатынын жазған болатын.