Jetisýda logıstıkalyq kompanıa ulttyq jáne shetel valútasyn repatrıasıalaý talaptaryn buzǵany úshin ákimshilik aıyppul 262,6 mln teńgege deıin ulǵaıtyldy. Prokýratýra aralasqannan keıin búdjetke qosymsha 55,7 mln teńge óndirildi, dep habarlaıdy infohub.kz saıty.
Oblys prokýratýrasynyń baspasóz qyzmetiniń málimetinshe, bul halyqaralyq mýltımodaldy logıstıkamen aınalysatyn aksıonerlik qoǵamnyń fılıaly týraly bolyp otyr. Kompanıa Qazaqstan Respýblıkasy Ákimshilik quqyq buzýshylyq týraly kodeksiniń 251-babynyń 2-tarmaǵyna sáıkes ákimshilik jaýapkershilikke tartyldy.
Bastapqyda Panfılov aýdandyq soty fılıalǵa 206,9 mln teńge kóleminde aıyppul salǵan bolatyn. Alaıda Panfılov aýdanynyń prokýratýrasy jaza taǵaıyndaý kezinde sot ÁQBtK-niń 44-babynyń talaptaryn tolyq eskermedi dep eseptep, apelásıalyq ótinishhat berdi.
«Apelásıalyq satydaǵy sot prokýratýranyń ustanymyn qoldap, aıyppul somasyn 262,6 mln teńgege deıin ulǵaıtty. Osylaısha, prokýrorlyq yqpal etý sharalarynyń arqasynda memleket kirisine qosymsha 55,7 mln teńge óndirilýi qamtamasyz etildi», — dep habarlady qadaǵalaý organy.
Qazirgi ýaqytta kompanıa ákimshilik aıyppuldy tolyq tóledi. Búdjetke 262,6 mln teńge tústi.
Buǵan deıin «Kýrsıv» «Qaraǵandy sý» JSHS las aǵyndy sýlar úshin 10 mln teńgege jýyq aıyppul salynǵanyn habarlaǵan bolatyn.