Kaspi.kz qandaı ónimderdi damytyp, qandaı sheshimderden bas tartatynyn klıentterdiń qajettilikteri aıqyndaıdy. Bul týraly Kazakhstan Growth Forum paneldik pikirtalasynda Kaspi.kz basshysy ári teń quryltaıshysy Mıhaıl Lomtadze aıtyp berdi, dep habarlaıdy infohub.kz saıty.
Ol mysal retinde bólimsheler jelisiniń tarıhyn keltirdi. 2008 jyly jańa brend iske qosylǵan soń kompanıa úsh kún saıyn bir bólimshe ashyp otyrǵan. Keıin klıentter Kaspi.kz onlaın-servısterin kóbirek paıdalana bastaǵanda, bólimshelerge degen qajettilik azaıdy. Kompanıa bólimshelerdi dál sondaı jıilikpen qysqarta bastady.
Lomtadzeniń túsindirýinshe, kompanıanyń mindeti — bólimshe salý emes, klıentterdiń qajettilikterin qanaǵattandyrý. Bólimshe ashý kerek pe, álde jabý kerek pe — muny dál osy qajettilik aıqyndaıdy.
«Bizde áńgime ylǵı bylaı: klıentke kerek pe, kerek emes pe. Klıentke kerek bolmasa, jabamyz. Klıentke kerek bolsa, damytamyz», — dedi ol.
Lomtadzeniń aıtýynsha, ónimdi klıentpen birge damytý qajet, onyń mindetin odan da jaqsy sheshýdiń jańa múmkindikterin eskerý kerek. Bul kompanıanyń ózi qalaı qurylǵanyn da qaıta qaraýǵa daıyn bolýdy talap etedi.
«Biz eń aldymen klıentti oılaımyz. Ózgerýimiz kerek bolsa, ózgeremiz», — dep atap ótti Kaspi.kz basshysy.
Kompanıa dál osy tásildi damýdyń kelesi kezeńine — kúndelikti mindetterge arnalǵan jeke AI-kómekshi jasaýǵa da qoldanyp otyr.
Bank qyzmeti Qazaqstan Respýblıkasynda lısenzıalanady.