Almaty oblysy Qarasaı aýdanyndaǵy Jibek joly aýylynda 200 orynǵa arnalǵan jańa mádenıet úıiniń ashylýy ótti. Nysannyń qurylysyna 658 mln teńge bólindi, dep habarlaıdy infohub.kz.
Jańa ǵımaratta kórermender zaly, sahna jáne shyǵarmashylyq úıirmelerge arnalǵan kabınetter jabdyqtalǵan. Munda konsertter men teatr qoıylymdary ótkizilip, dombyra, jyr-terme, vokal, bı jáne qoldanbaly óner úıirmeleri jumys isteıtin bolady.
Sonymen qatar, mádenıet úıiniń bazasynda aqyndarǵa arnalǵan «Shejire» tálimgerlik ortalyǵy men úlken býyn ansambli qurylady. Bul alań balalar men jastardyń shuǵyldanýyna jáne ulttyq dástúrlerdi saqtaýǵa yqpal etedi dep kútilýde.
Sońǵy tórt jylda Almaty oblysynyń mádenı ınfraqurylymyn damytýǵa 52,6 mlrd teńge baǵyttaldy. Osy ýaqyt ishinde 10 jańa mádenı nysan salynyp, taǵy 19 mádenıet úıi jóndeldi.
Bul rette jumystar jalǵasýda. Jambyl aýdanyndaǵy Qarǵaly jáne İle aýdanyndaǵy Boraldaı eldi mekenderinde mádenıet úıleri salynýda. Aǵymdaǵy jyly Jambyl aýdanynyń Shıen aýylyndaǵy nysannyń qurylysy da aıaqtaldy.