Qazaqstanda magıstratýraǵa túsýge arnalǵan keshendi testileýdiń aralyq qorytyndysy shyǵaryldy: 67 qatysýshy ereje buzǵan, dep habarlaıdy infohub.kz saıty.
Ǵylym jáne joǵary bilim mınıstrliginiń málimetinshe, testileýden 43 myńnan astam úmitker ótken. Ǵylymı-pedagogıkalyq baǵyt boıynsha shekti baldy 44% úmitker jınasa, kásiptik baǵyt boıynsha 21% jınaǵan. Ǵylymı-pedagogıkalyq baǵyt boıynsha ortasha kórsetkish 75 baldy qurasa, kásiptik baǵyt boıynsha 23 bal boldy. Eń joǵary bal — 138.
Magıstratýraǵa túsý úshin ǵylymı-pedagogıkalyq baǵyt boıynsha shekti bal — 75, kásiptik baǵyt boıynsha — 30 bal ekeni atap ótildi. Sonymen qatar, testileý bastalǵannan beri ereje buzǵany úshin 67 qatysýshynyń nátıjesi joıyldy. Onyń ishinde smartfon, shpargalka jáne basqa da tyıym salynǵan zattardy ótkizýge tyrysqany úshin 49 úmitker testileýge jiberilmedi. Testileý kezinde ereje buzǵany úshin aýdıtorıadan 18 adam shyǵarylyp, olardyń nátıjeleri de joıyldy.
Keshendi testileý nátıjelerimen kelispegen jaǵdaıda, úmitkerler testileý aıaqtalǵannan keıin onlaın apelásıa bere alady. Apelásıa 7 jumys kúni ishinde qaralady, sodan keıin úmitkerdiń sertıfıkaty jeke kabınette qoljetimdi bolady, dep atap ótti mınıstrlikte.
Vedomstvo keshendi testileýge barlyǵy 61 myńnan astam ótinish túskenin eske saldy. Al bıyl magıstratýrada oqýǵa shamamen 11 myń grant bólingen.