Mańǵystaý oblysyndaǵy tótenshe jaǵdaıǵa baılanysty Qazaqstan Respýblıkasy Premer-Mınıstriniń orynbasary Qanat Bozymbaevtyń tóraǵalyǵymen Úkimettik komısıa otyrysy ótti: kúdiktiler anyqtalyp, qaza tapqandardyń otbasylaryna qajetti kómektiń barlyǵy kórsetilýde, dep habarlaıdy infohub.kz saıty.
Otyrysta alǵashqy tergeý is-sharalarynyń nátıjeleri, sondaı-aq bolǵan oqıǵanyń barlyq sebepteri men mán-jaılaryn anyqtaýǵa qatysty kelesi qadamdar qaraldy.
İshki ister mınıstriniń orynbasary Sanjar Ádilov baıandaǵandaı, qaza tabý faktisi boıynsha Qazaqstan Respýblıkasy Qylmystyq kodeksiniń 453-babynyń 2-bóligi («Aýyr zardaptarǵa ákep soqqan qyzmetke nemquraıly qaraý») jáne 465-baby («Keme júrgizý erejelerin buzý») boıynsha qylmystyq ister qozǵaldy.
«Tergeý áskerılerdiń qaýipsizdigin qamtamasyz etýge, oqý-jattyǵýlardy uıymdastyrýǵa jáne qutqarý is-sharalaryn júrgizýge baılanysty buzýshylyqtarǵa jol bergen laýazymdy tulǵalardy anyqtady. Olardyń áreketterine quqyqtyq baǵa berilýde», – dedi Ádilov.
Oqıǵadan keıin qutqarylǵan áskerı qyzmetshiniń jaǵdaıy bólek qaraldy. Densaýlyq saqtaý vıse-mınıstri Manas Ramazanov habarlaǵandaı, onyń jaǵdaıy turaqty, ómirine qaýip joq. Áskerı qyzmetshi esin jıyp, qajetti medısınalyq kómektiń barlyǵyn alyp jatyr, ómirine eshqandaı qaýip tónip turǵan joq. Qasynda ata-anasy bar.
Otyrys barysynda qaza tapqandar men zardap shekken áskerılerdiń otbasylaryna jan-jaqty qoldaý kórsetý jóninde naqty tapsyrmalar berildi. Atap aıtqanda, túsetin qarajattyń barlyǵyn bólýdiń tolyq ashyqtyǵyn qamtamasyz etý tapsyryldy. Bul rette materıaldyq kómek zańda qarastyrylǵan memlekettik tólemder men ótemaqylardy ǵana emes, bıznes ókilderi men mesenattar tarapynan kórsetiletin qarjylyq qoldaýdy da qamtıdy.
Osy qarajatty jınaqtaý úshin Mańǵystaý oblysynyń ákimdigi arnaıy qor anyqtady, onyń qyzmeti turaqty baqylaýǵa alyndy.