Mańǵystaý oblysynda avarıalyq turǵyn úı qoryn jańartý jáne azamattardy qaýipsiz baspanamen qamtamasyz etý jumystary belsendi júrgizilýde. Joba memlekettik-jekeshelik áriptestik aıasynda iske asyrylýda, dep habarlaıdy infohub.kz saıty.
Mańǵystaý oblysynyń ákimi Nurdáýlet Qılybaı Jańaózen qalasyndaǵy, sondaı-aq Beıneý jáne Qaraqıa aýdandaryndaǵy avarıalyq úılerdi jańǵyrtý jobalarymen tanysty. 2025 jyldyń qorytyndysy boıynsha óńirde 61 avarıalyq úı bar, olardy kezeń-kezeńimen jańartyp, turǵyndardy qaýipsiz baspanaǵa kóshirý josparlanýda.
Jańaózende Vokzal, Shańyraq jáne Shuǵyla shaǵyn aýdandaryndaǵy 322 páterdi qamtıtyn 25 avarıalyq úıdi jańartý kózdelgen. Turǵyndar jańa úılerge kóshirilip, eski ǵımarattar buzylady. Olardyń ornyna zamanaýı ınjenerlik ınfraqurylymy men abattandyrylǵan 180 jáne 160 páterlik jańa úıler salynady.
Beıneý aýdanynda 17 avarıalyq úı bar: Boranqul aýylynda 12, Esette 2, Aqjigitte 2 jáne Tólepte 1. Boranqul men Eset turǵyndaryn kóshirý úshin jańa úıler salynsa, Aqjigit pen Tólepte buzý jumystary júrgiziledi.
Qaraqıa aýdanynda Munaıshy aýylynyń Temirjolshy jáne Saltanat shaǵyn aýdandaryndaǵy 15 avarıalyq úıdi jańartý josparlanýda. Turǵyndardy kóshirý úshin 336 páterlik 5 kóppáterli turǵyn úı salynady.
Úsh aýmaqtaǵy jańa úılerdiń jalpy aýdany 53 myń sharshy metrden asady. Qurylys 2027 jyly bastalyp, 2029 jyly aıaqtalady.
Oblys ákimi avarıalyq úı turǵyndaryn qaýipsiz baspanamen qamtamasyz etý óńirdiń mańyzdy mindetteriniń biri ekenin atap ótti. «Memleket basshysy halyqtyń ómir súrý sapasyn arttyrýǵa, azamattardy qaýipsiz ári jaıly baspanamen qamtamasyz etýge erekshe nazar aýdarady. Biz avarıalyq úıler máselesin júıeli túrde sheshýimiz kerek. Bul rette turǵyndardy kóshirý, jańa úıler salý jáne eski nysandardy buzý jumystary ózara baılanysty jáne naqty josparǵa sáıkes júrgizilýi tıis. Eń bastysy — qurylys sapasy men merzimderin qatań saqtaý, turǵyndardyń quqyqtary men múddelerin eskerý. Ár joba boıynsha jumystardy turaqty baqylaýda ustaý qajet», — dedi Nurdáýlet Qılybaı.
Sapar qorytyndysy boıynsha ákim jaýapty organdarǵa daıyndyq jumystaryn jedeldetip, jobalardyń belgilengen merzimde sapaly iske asyrylýyn qamtamasyz etýdi tapsyrdy.