Fýtbol tarıhyndaǵy eń daýly goldardyń birin Dıego Maradona soqqan ańyzǵa aınalǵan dop aýksıonda 3,3 mıllıon dollarǵa (1,51 mıllıard teńge) satyldy. Bul — 1986 jylǵy álem chempıonatynyń shırek fınalynda Argentına men Anglıa arasyndaǵy machta qoldanylǵan Adidas Azteca dopy, dep habarlaıdy infohub.kz.
Bul mach Maradonanyń karerasyndaǵy eń ataqty oıyndardyń biri boldy. 51-mınýtta ol qolymen gol soqty, biraq ereje boıynsha bul gol eseptelmeýi kerek edi. Tóreshi buzýshylyqty baıqamaı, goldy eseptedi. Oıynnan keıin Maradonanyń ózi kúlimsirep: «Bul — Maradonanyń basy men Qudaıdyń qoly» dep pikir bildirdi.
Birneshe mınýttan keıin argentınalyq oıynshy dúbl jasap, keıin «ǵasyrdyń goly» dep atalǵan goldy soqty. Maradona dopty alańnyń jartysynan ótkizip, aǵylshynnyń bes oıynshysyn aınalyp ótip, qaqpashyny da basyp ozdy. Nátıjesinde Argentına machta 2:1 esebimen jeńiske jetti.
Fınaldyq ysqyryqtan keıin týnıstik tóreshi Álı Bın Nasser dopty ózine alyp, 30 jyldan astam ýaqyt saqtady. 2023 jyly ol dál osy Adidas Azteca dopynyń machta qoldanylǵan jalǵyz dop ekenin jazbasha rastady. Keıin onyń túpnusqalyǵyn táýelsiz sarapshylar da rastady.
Bın Nasser dopty alǵash ret 2022 jyly aýksıonǵa qoıyp, ol 2,37 mıllıon dollarǵa (1 mıllıard teńgeden sál astam) satyldy. Jańa ıesi 2023 jyly ony qaıta satýǵa tyrysty, biraq saýda-sattyq sátsiz aıaqtaldy: qatysýshylar eń tómengi baǵany usynbady.
Bul joly dop taǵy da 3,3 mıllıon dollarǵa satyldy. Degenmen kútý áldeqaıda joǵary boldy: mamandar shamamen 10 mıllıon dollar (4,5 mıllıard teńge) jınalady dep boljaǵan.
Salystyrý úshin, Maradonanyń sol machta kıgen jeıdesi 2022 jyly aýksıonda 9,6 mıllıon dollarǵa (4,4 mıllıard teńge) satylǵan edi.
Buǵan deıin Mark Hemıll «Juldyzdar soǵysy: Imperıa shabýyl jasaıdy» fılminiń túsiriliminde qoldanǵan Lúk Skaıýokerdiń túpnusqa jaryq qylyshy aýksıonda rekordtyq 3,75 mıllıon dollarǵa (1,7 mıllıard teńgeden sál astam) satylǵany habarlanǵan bolatyn.