Soltústik Qazaqstan oblysynda qashyqtyqtan jasalǵan alaıaqtyq týraly qylmystyq is boıynsha sot úkimi shyqty. infohub.kz saıtynyń habarlaýynsha, qylmyskerler Petropavl turǵynyna qońyraý shalyp, ózderin bank qyzmetkerleri retinde tanystyryp, onyń shottaryna bógde adamdardyń qol jetkizgenin aıtqan. Aqshany qorǵaý syltaýymen alaıaqtar er adamdy nesıe rásimdep, aqshany kórsetilgen shotqa aýdarýǵa kóndirgen.
Osydan keıin qylmystyq sqemaǵa qatysýshylardyń biri Pavlodarda bankomat arqyly jábirlenýshige tıesili 2 mıllıon 860 myń teńgeni qolma-qol alyp, ony krıptovalútaǵa aıyrbastap, bir bóligin ózine syıaqy retinde qaldyrǵan. Betin medısınalyq maska men kepkamen jasyryp, bankomat aldyndaǵy beınekameralardan qutylýǵa tyrysqan.
Alaıda bul aıla-sharǵylar kómektespedi. Tergeý barysynda polısıa qyzmetkerleri kúdiktiniń jeke basyn anyqtady — ol Pavlodar oblysynyń 21 jastaǵy turǵyny bolyp shyqty. Sot onyń «qolma-qol aqsha alýshy» rólin sanaly túrde oryndaǵanyn anyqtady. Mamyr aıynyń sońynda jarıalanǵan úkim amnıstıaǵa baılanysty jeńildetildi — sottalýshyǵa bir jyl bas bostandyǵyn shekteý jazasy taǵaıyndaldy. Sonymen qatar, sot ony jábirlenýshige keltirilgen 2 mln 790 myń teńge kólemindegi zalaldy óteýge mindettedi. Úkim zańdy kúshine endi.