Áleýmettik jeli qoldanýshylary 1937 jylǵy freskadan smartfondy baıqap, ýaqyt sapary týraly málimdedi, dep habarlaıdy infohub.kz saıty.
Jelide ıtalo-amerıkalyq sýretshi Ýmberto Romano salǵan «Mıster Pınchon jáne Sprıngfıldti ıgerý» atty freska jóninde talqylaý qyzdy. Týyndyda Sprıngfıld (Massachýsets shtaty) qalasynyń negizin qalaýshy Ýılám Pınchon kolonıster men jergilikti baıyrǵy amerıkandyq taıpa ókilderiniń ortasynda beınelengen.
Qoldanýshylardyń nazaryn aldyńǵy plandaǵy, qolynda jyltyr jıegi bar tikburyshty qara zat ustap, oǵan qadala qarap turǵan er adamnyń beınesi tartty. Kóbi sol zattan qazirgi smartfondy kórip, ýaqyt sapary týraly teorıalardy tarata bastady.
Freska Massachýsets shtatynyń úkimet ǵımaratynda ornalasqan, buryn ony Sprıngfıldtiń bas poshtasy ıelengen. Kartına Uly depressıa kezinde ónerdi qoldaýǵa arnalǵan Federal Art Project úkimettik baǵdarlamasy aıasynda salynǵan.
Tarıhshylar men ónertanýshylar konspırologıalyq nusqalardy joqqa shyǵaryp, qarapaıym túsinikteme usynady. Bálkim, sýretshi XVII ǵasyrda eýropalyq qonystanýshylar men Amerıkanyń baıyrǵy halyqtary arasyndaǵy saýdada keń taraǵan qalta aınasyn beınelegen bolar. Zertteýshiler basqa da yqtımal nusqalar retinde shaǵyn dinı basylymdy nemese temir júzdi ataıdy.
Sarapshylardyń pikirinshe, konspırologıalyq teorıa gadjetterge úırengen qazirgi kórermenderdiń kóz aldaýy men qabyldaýynyń nátıjesi boldy.