Qazaqstanda mektep formasynyń bolmaýyna baılanysty oqýshyny sabaqtan shettetýge bola ma, jáne syrtqy kelbetke qoıylatyn talaptardy buzǵany úshin ata-analar qandaı jaýapkershilikke tartylatyny túsindirildi, dep habarlaıdy infohub.kz saıty.
Oqý-aǵartý birinshi vıse-mınıstri Shynar Aqparova OKQ-daǵy brıfıńte «Bilim týraly» zańǵa sáıkes balalardy oqý prosesinen shettetýge jol berilmeıtinin eske saldy. «Balanyń sapaly bilim alýǵa quqyǵy bar. Sondyqtan mektep formasynyń talaptaryna saı kelmeıtin kıimmen kelgen balany mektepke kirgizbeýge bolmaıdy», — dep atap ótti ol.
Sonymen qatar, zańnama talaptaryn buzǵany úshin ata-analarǵa jaýapkershilik qarastyrylǵan. Aqparovanyń aıtýynsha, «Bilim týraly» zańnyń 47-baby bilim alýshylarǵa qatysty bolsa, 49-bap ata-analardy bilim berý uıymy ata-analar komıtetimen jáne qamqorshylyq keńesimen birlesip belgilegen mektep formasyn kıý erejelerin saqtaýdy qamtamasyz etýge mindetteıdi. Bul normalardy saqtamaǵany úshin 5 AEK mólsherinde ákimshilik aıyppul qarastyrylǵan, bul 21 625 teńgeni quraıdy.