Meta kompanıasy rejıssór Aleks Gıbnıdiń «Mask» atty derekti fılminiń jarnamalyq treılerlerine salynǵan tyıymdy alyp tastady. Buǵan dıstrıbútor Bleecker Street kompanıasynyń apelásıasy men buqaralyq aqparat quraldarynyń nazary sebep boldy, dep habarlaıdy infohub.kz saıty.
Meta «Mask» (Musk) fılmine aqyly jarnama ornalastyrýǵa qoıylǵan tyıym týraly sheshimin qaıta qarady. Kompanıa ókili TechCrunch basylymyna bergen málimdemesinde promomaterıaldardy jarıalaýdan bastapqy bas tartý qatelikten týyndaǵanyn, qazir jarnamalyq habarlandyrýlar qalpyna keltirilip jatqanyn aıtty.
Buǵan deıin fılmniń amerıkandyq dıstrıbútory Bleecker Street Meta, YouTube, TikTok jáne Ilon Maskke tıesili X jelisin qosa alǵanda, negizgi áleýmettik platformalarda jarnamalyq treılerlerdiń jappaı qabyldanbaýyna tap bolǵan edi. Servıs ókilderi shekteýlerdi saıası jáne sezimtal kontentti taratýdy retteıtin erejelermen túsindirgen.
Dıstrıbútordyń bastapqy apelásıasyn Meta áýelde qabyldamaǵan, alaıda jýrnalıser kompanıa basshylyǵyna júgingennen keıin ustanymyn ózgertti. Dál osyndaı qadamdy YouTube beıneplatformasy da jasady. Ol treılerdiń jarnamalyq habarlandyrý retinde kórsetilýi júıe algorıtmderimen ýaqytsha shektelgenin, biraq qaıta tekserýden keıin iske qosýǵa ruqsat berilgenin málimdedi.
Sonymen qatar X platformasy aldaǵy fılmniń kez kelgen promoaksıasyn tolyqtaı buǵattaýdy jalǵastyryp otyr. Ilon Masktiń ózi buǵan deıin rejıssór Aleks Gıbnıdi áleýmettik jelilerde ashyq synaǵan bolatyn.
Uzaqtyǵy shamamen úsh saǵatqa sozylatyn «Mask» derekti fılmi kásipkerdiń mansaby, tehnologıalyq jobalary jáne kópshilik aldyndaǵy málimdemeleri týraly baıandaıdy. Fılmniń kınoteatrlardaǵy tusaýkeseri 9 qazanǵa josparlanǵan.
Sarapshylardyń aıtýynsha, fılmniń jarnamalyq promomaterıaldaryn aınalasyndaǵy jaǵdaı derekti kıno jasaýshylardyń ótkir áleýmettik kontentti iri sıfrlyq jelilerde ilgeriletý kezinde kezdesetin qıyndyqtardy aıqyn kórsetti.