Astanalyq «Barys» bas bapkeri Mıhaıl Kraves Kontınentaldy hokeı lıgasynyń (KHL) turaqty chempıonatyndaǵy Ýfanyń «Salavat Iýlaev» komandasyn jeńgen jarqyn oıynnyń qorytyndysyn shyǵardy. «Barys Arenada» ótken kezdesý qojaıyndardyń paıdasyna 8:6 esebimen aıaqtaldy. Bul — maýsymnyń basyndaǵy qatarynan ekinshi jeńis, dep habarlaıdy infohub.kz saıty.
Mach bastalar aldynda kásibı mansabyn aıaqtaǵan Roman Starchenkony qurmetteý saltanatty rásimi ótti. Arena kúmbezine «Barys» pen Qazaqstan quramasynyń kóp jylǵy kapıtanynyń tegi men 48 nómiri jazylǵan tý kóterildi.
Oıynnan keıin Mıhaıl Kraves komandany jeńispen quttyqtap, astanalyqtar 4:1 esebimen utqan birinshi kezeńdi erekshe atap ótti. «Barlyǵyn jeńispen quttyqtaımyn, jaqsy komandany uttyq. Kórermen kóp boldy, kórermen úshin jaqsy oıyn boldy. Al biz úshin eki upaı... Qalǵanyn keıin vıdeo qarap, oıyndy taldaımyz», — dep keltiredi bapkerdiń sózin klýbtyń baspasóz qyzmeti.
Maman búkil mach boıy komandasynyń dál osylaı oınaǵanyn qalaıtynyn jetkizdi. «Bizdiń birinshi kezeńdegideı oınaǵanymyzdy qalaımyn, sonda bári boldy. Baqylaý boldy, momentter boldy, biz óz jumysymyzdy durys oryndadyq».
4:1 esebinen keıin «Salavat Iýlaev» alshaqtyqty eki ret azaıtty: aldymen 4:3-ke deıin, al úshinshi kezeńde 7:5 esebimen qojaıyndarǵa jaqyndady. Sońynda komandalar ekeýara 14 shaıba soǵyp, fınaldyq sırena «Barystyń» 8:6 esebimen jeńisin bekitti.
Kraves komandanyń tek shabýyldaǵy áreketine ǵana emes, rıza boldy. Onyń aıtýynsha, astanalyqtardyń qatelikteri kóbinese quramnyń jas bolýyna baılanysty. «Shabýylda — sýper. Taǵy da aıtamyn, tek shabýylda emes, qorǵanysta da sýper boldy. Ásirese birinshi kezeń. Jigitterdiń júz paıyzǵa berilýi maǵan unaıdy. Qatelikter — jasqa baılanysty. Biz qaıtadan taldap, qarap, joıamyz. Berilýi, qozǵalysy jáne jeńýge degen qulshynysy boıynsha bári jaqsy».
Goldardyń kóptiginen mach Juldyzdar oıynyn eske túsirgeni týraly eskertýge bapker Starchenkony qurmetteý rásimine baılanysty jaýap berdi. «Biz búgin juldyzdy shyǵaryp saldyq, sondyqtan juldyzdarsha oınadyq. Bul jerde alańdaıtyn eshteńe joq, kelesi oıynǵa daıyndalý kerek».
«Barys» maýsymdy eki úıdegi jeńispen bastady. Birinshi týrda Kraves komandasy Novosibirdiń «Sibirin» 7:1 esebimen tas-talqan etse, endi «Salavat Iýlaevqa» segiz shaıba soqty. Osylaısha, alǵashqy eki machta astanalyqtar 15 gol soqty.
Bas bapker sátti starttan keıin komanda shoǵyrlanýdy joǵaltpaýy kerektigin atap ótti. «Bizde azdap úzilis bar. Eń bastysy — demalý, qalpyna kelý, kelesi oıynǵa sergek bas pen energıa. Búgin chempıonat aıaqtalmaıdy, ári qaraı oınaý kerek. Sondyqtan demalamyz, jattyǵamyz jáne daıyndalamyz».
«Barystyń» kelesi machy da úıde ótedi — 12 qyrkúıekte Habarovskiniń «Amýryna» qarsy. Odan keıin astanalyqtar qonaqtyq serıaǵa attanady.