Qazaqstandyqtar arasyndaǵy jeke maqsattaǵy mobıldi aýdarymdar zańdy ári salyq salynbaıdy. Alaıda aqsha kásipkerlik maqsatta jumsalsa, jaǵdaı ózgeredi. Mańǵystaý oblysynyń memlekettik kirister departamenti eske salǵandaı, aýdarymdar tabys dep tanylýy úshin birneshe krıterıge saı bolýy kerek, dep habarlaıdy infohub.kz saıty.
Mobıldi aýdarymdar salyq organdarynyń nazaryna iligýi úshin úsh belgi bir mezgilde bolýy tıis: bir jeke tulǵanyń shotyna nemese shottaryna kelýi; bir aıda 100 túrli adamnan túsýi — jáne osylaı úsh aı qatarynan; úsh aıdaǵy jalpy somasy 12 eń tómengi jalaqydan, ıaǵnı 2026 jyly 1 020 000 teńgeden asýy.
Jeke maqsatta mobıldi aqsha aýdarymdaryn jıi qabyldaıtyn qatardaǵy qazaqstandyqtar ádette tekseriske ilikpeıdi. Týystarǵa kómek, týǵan kúnge nemese úılený toıyna syılyq, qaryzdy qaıtarý, mektep qajettilikterine jınaý, birlesken shyǵyndardy óteý — salyq organdaryn qyzyqtyrmaıtyn jeke aýdarymdar. Mundaı aýdarymdardyń turaqtylyǵy ózi baqylaýǵa negiz bola almaıdy.
Tek jeke tulǵa ózi salyq salýǵa tıis tabystardy ǵana deklarasıalaýy kerek. Jeke aýdarymdar, syılyqtar jáne týystardyń kómegi mundaı tabystarǵa jatpaıdy, sáıkesinshe olardy deklarasıalaýdyń qajeti joq.
Eger mobıldi aýdarymdar kúdikti dep tanylsa, bankter olar týraly aqparatty salyq organdaryna beredi. Alaıda málimetterdi berý salyqtyń nemese aıyppuldyń avtomatty túrde eseptelýin bildirmeıdi. Aldymen salyq qyzmeti azamatqa habarlama jiberedi, onyń túsimderdiń shyǵý tegin túsindirýge 30 jumys kúni bolady.
Aýdarymdar shynymen kásipkerlik qyzmetten túsken tabys bolǵan jaǵdaıda, bárin zań boıynsha rásimdeý qajet: tabystardy kórsetý, salyq pen áleýmettik tólemderdi tóleý nemese jeke kásipker ne ózin-ózi jumyspen qamtyǵan tulǵa retinde tirkelý.
Eger adam taýarlar, jumystar nemese qyzmetter úshin aqshany júıeli túrde alsa, mundaı aýdarymdar kásipkerlik qyzmetten túsken tabys dep tanylady. Bul jaǵdaıda resmı jumys isteýdi bastaý kerek: tólemderdi tek kásipkerlik qyzmetke arnalǵan shottarǵa qabyldap, olardy zań boıynsha rásimdeý qajet. Áıtpese, buzýshyny ákimshilik jaýapkershilikke tartýy múmkin.