Halyqaralyq Moody's reıtıń agenttigi Qazaqstannyń egemendi kredıttik reıtıńin «Baa1» deńgeıinde «Turaqty» boljammen rastady. Bul týraly Qazaqstan Respýblıkasynyń Ulttyq ekonomıka mınıstrligi habarlady, dep jazady infohub.kz saıty.
Agenttiktiń sheshimi eldiń myqty fıskaldyq ustanymyn kórsetedi. Ony memlekettik qaryzdyń tómen deńgeıi, oǵan qyzmet kórsetý qabiletiniń joǵarylyǵy jáne jınaqtalǵan valútalyq aktıvter qoldap otyr. Moody's baǵamy boıynsha, munyń bári Qazaqstanǵa ekonomıkalyq saıasatta ıkemdilik pen syrtqy ekonomıkalyq shoktardyń saldaryn jumsartýǵa berik qor beredi.
Munaı óndirý azaıǵanyna qaramastan, el ekonomıkasy ósýin jalǵastyryp otyr. Óńdeý ónerkásibi, qurylys, kólik jáne basqa da munaıǵa qatysy joq sektorlar ósimniń qozǵaýshy kúshine aınaldy.
Moody's sıfrlyq, kólik jáne energetıkalyq ınfraqurylymǵa salynatyn ınvestısıalar orta merzimdi ekonomıkalyq ósýdi qoldap, ekonomıka qurylymynyń kúrdeliligin arttyra beretinin kútedi. Agenttiktiń boljamynsha, ósýdiń negizgi draıverleri shıkizattyq emes salalar bolyp qala beredi.
Agenttik sondaı-aq salyq reformalary búdjettiń munaıǵa qatysy joq kiris bazasyn keńeıtý arqyly fıskaldyq turaqtylyqty nyǵaıtady dep esepteıdi. Ekonomıkany odan ári ártaraptandyrý salyq reformasymen jáne ınfraqurylymdyq ınvestısıalarmen qatar, Moody's baǵamy boıynsha, fıskaldyq perspektıvalar men ekonomıkalyq ósý múmkindikterin jaqsartady.
Buǵan deıin «Kýrsıv» S&P Global Ratings Qazaqstannyń bank júıesiniń salalyq baǵasyn «7»-den «6»-ǵa kóterip, «ekonomıkalyq táýekel» komponenti boıynsha boljamdy «Turaqtydan» «Pozıtıvke» ózgertkenin jazǵan. Qaıta qaraýdan keıin Bank SentrKredıttiń uzaq merzimdi reıtıńi «BB+»-ke deıin ósip, Halyk Bank, Nurbank jáne Freedom reıtıńteri boıynsha boljamdar pozıtıvti boldy.