Astana bıligi qala shetinde qajetti ınfraqurylymy joq jerlerde jer telimderin bólýge jáne kóppáterli turǵyn úıler salýǵa ýaqytsha shekteý engizýdi josparlap otyr, dep habarlaıdy infohub.kz saıty.
Astana qalasynyń sáýlettik kelbetin qalyptastyrý jáne qala qurylysyn josparlaý qaǵıdalaryna jańa ózgerister engizý josparlanýda. Bul usynyspen qalalyq Sáýlet, qala qurylysy jáne jer qatynastary basqarmasynyń basshysy Altynbek Ahmetov shyqty.
Máslıhat sheshimine engiziletin ózgerister QR premer-mınıstriniń birinshi orynbasarynyń tapsyrmasyn oryndaý maqsatynda ázirlendi. Negizgi jańashyldyq qala shetindegi turǵyn aımaqtardyń keńeıýin qatań baqylaýǵa alýǵa baǵyttalǵan.
Qaǵıdalardy magıstraldyq ınjenerlik jelilermen jáne áleýmettik ınfraqurylymmen qamtamasyz etilmegen qala shetindegi aýmaqtarda 2035 jylǵa deıin jer telimderin berýge jáne kóppáterli turǵyn úıler salýǵa ýaqytsha shekteý qarastyratyn tarmaqpen tolyqtyrý usynylady.
Bul shara turǵyn úı keshenderi ınjenerlik komýnıkasıalardan, joldardan, mektepter men emhanalardan bólek salynatyn qala shetindegi retsiz qurylysty toqtatýǵa baǵyttalǵan.
Sáýlet basqarmasynda daıyndalǵan jobanyń ýákiletti memlekettik organdarmen kelisý rásimderinen ótkenin jáne Qazaqstan Respýblıkasynyń qoldanystaǵy zańnamasyna tolyq sáıkes keletinin atap ótti.
Jańa normany iske asyrý qalalyq nemese respýblıkalyq búdjetten qosymsha qarajat bólýdi talap etpeıdi. Sonymen qatar, salalyq vedomstvonyń málimdeýinshe, engiziletin ózgerister qurylys naryǵynyń adal qatysýshylary men bıznes úshin ákimshilik kedergiler týǵyzbaıdy.