Sársenbide tańǵy saýda-sattyqta álemdik munaı baǵasy jetkizilimniń buzylý qaýpine baılanysty ortasha ósti, dep habarlaıdy infohub.kz.
Buǵan AQSH-tyń Irannyń áskerı nysandaryna qatarynan 11-shi tún soqqy berýi jáne Kýveıttiń ırandyq drondardy ustap qalýy sebep boldy. Qazan aıyndaǵy Brent munaıynyń fúchers baǵasy 0,55%-ǵa (50 sentke) kóterilip, barreline 91,51 dollardy qurady. Amerıkandyq WTI munaıy 0,36%-ǵa (30 sentke) qymbattap, barreline 84,64 dollarǵa jetti. Bul ósim saýda kóleminiń tómen bolýy aıasynda oryn aldy.
Aldyńǵy kúni munaı baǵasy bes aptalyq maksımýmǵa jetken edi. AQSh áskeri Irannyń ońtústigi men batysyndaǵy nysandarǵa soqqy bergen, al Iran Bahreın, Kýveıt jáne Iordanıadaǵy amerıkandyq nysandarǵa shabýyldaǵan. AQSh áskerıleriniń málimetinshe, jańa soqqylar serıasy seısenbi kúni keshke (AQSh ýaqytymen) bastalyp, Iranda sársenbi tańyna sáıkes kelgen. Sonymen birge Kýveıt áskeri eldiń áýe qorǵanys júıeleri ırandyq drondardy ustap qalǵanyn habarlady.
Soqqylardyń jalǵasýy naryq qatysýshylarynyń álemdik energıa tasymalynyń turaqtylyǵyna degen alańdaýshylyǵyn kúsheıtýde. Iran qoldaıtyn ıemendik hýsıtter Saýd Arabıasynyń munaıy bar kemelerge Bab-ál-Mandeb buǵazynda shabýyl jasaıtyndaryn málimdep, Saýd Arabıasyna teńiz blokadasyn jarıalady. Qyzyl teńizdiń ońtústik kireberisinde ornalasqan Bab-ál-Mandeb buǵazy Saýd Arabıasy munaıynyń eksporty úshin mańyzy artyp keledi. Bul aı basynda AQSh pen Iran arasyndaǵy ýaqytsha bitimniń buzylýynan keıin Ormýz buǵazy arqyly jetkizilimniń kúrt tómendeýine baılanysty.
AQSh qorǵanys mınıstri Pıt Hegsettiń aıtýynsha, Irandaǵy áskerı naýqanǵa 37,5 mlrd dollar jumsalǵan — bul aldyńǵy baǵalaýdan 8 mlrd dollarǵa artyq. Investorlardyń nazaryn Amerıkandyq munaı ınstıtýtynyń (API) derekteri de aýdardy: AQSH-ta shıki munaı men dıstıllát qorlary ótken aptada ósken, al benzın qory azaıǵan. Endi naryq AQSh Energetıkalyq aqparat basqarmasynyń (EIA) resmı statısıkasyn kútýde, bul munaı baǵasynyń ári qaraıǵy dınamıkasyna áser etýi múmkin.