Shymkent turǵyny ákesi qaıtys bolǵannan 14 jyl ótken soń murany daýlaýǵa tyrysty, biraq Kasasıalyq sot oǵan muraǵa kirý merzimi alty aı ekenin eske salyp, talapty qanaǵattandyrmady, dep habarlaıdy infohub.kz.
İs qujattaryna sáıkes, 2011 jyly er adam qaıtys bolǵannan keıin onyń anasy turǵyn úı men jer telimine muragerlik quqyǵy týraly kýálik alǵan. 14 jyl ótken soń qaıtys bolǵan adamnyń qyzy ózin muragerler qataryna qospaǵanyn aıtyp, sotqa júginip, muragerlik kýálik pen ósıetti jaramsyz dep tanýdy suraǵan.
Birinshi jáne apelásıalyq satylardaǵy sottar talapty qanaǵattandyrǵanymen, kasasıalyq saty kerisinshe sheshim qabyldady. Kasasıada zań boıynsha murany mura qaldyrýshy qaıtys bolǵan kúnnen bastap alty aı ishinde qabyldaý kerektigi túsindirildi. Ótkizip alynǵan merzim tek sot arqyly jáne tek dáleldi sebepter bolǵan jaǵdaıda ǵana qalpyna keltirilýi múmkin.
Sonymen qatar, qaıtys bolǵan adamnyń qyzy buryn murany qabyldaý úshin eshqandaı áreket jasamaǵany, merzimdi qalpyna keltirýdi suramaǵany jáne muragerlik úıde turǵanyn dáleldemegeni anyqtaldy. Áıel keshiktirýdi ákesi qaıtys bolǵan kezde kámeletke tolmaǵanymen jáne ata-anasynyń ajyrasqanymen túsindirdi. Alaıda sot balanyń múddesin zańdy ókilder qorǵaıtynyn, al anasynyń muny isteı almaǵany nemese ata-ana quqyǵynan shektelgeni týraly dálelder usynylmaǵanyn atap ótti.
Nátıjesinde kasasıa adam óz muragerlik quqyǵyn ýaqytynda resimdemese, ol basqalardyń qujattary men ósıetterin jaramsyz dep tanı almaıdy degen sheshimge keldi. Sot tómengi satylardyń sheshimderin joıyp, talapkerdiń talabyn túpkilikti qanaǵattandyrmady.