Nazarbayev University álemdik ýnıversıtetterdiń Times Higher Education (THE) World University Rankings reıtıńinde ekinshi jyl qatarynan nátıjesin jaqsartyp, eki jylda 200 satyǵa kóterildi. Ýnıversıtet málimetinshe, 2024 jyly ol 501–600 dıapazonynda bolǵan, kelesi reıtıńtik sıklde 401–500-ge kóterilgen, al bıylǵy reıtıńte 376–400 tobyna enip, Qazaqstan men Ortalyq Azıanyń joǵary oqý oryndary arasynda birinshi oryndy saqtap qaldy, dep habarlaıdy infohub.kz saıty.
THE World University Rankings álemdegi eń bedeldi ýnıversıtet reıtıńteriniń biri sanalady. Bıyl oǵan 118 el men aımaqtan rekordtyq 2 297 ýnıversıtet endi — bul ótken jylmen salystyrǵanda 106-ǵa artyq. Halyqaralyq báseke kúsheıip jatqan jaǵdaıda Nazarbayev University eki jylda álemniń úzdik 23%-nan úzdik 17%-yna kóterildi.
THE ýnıversıtetterdi bes baǵyt boıynsha baǵalaıdy: bilim sapasy, zertteý ortasy, zertteý sapasy, halyqaralyq ashyqtyq jáne ındýstrıamen yntymaqtastyq. Jańa reıtıńte NU barlyq derlik baǵyt boıynsha nátıjesin jaqsartty. Eń kúshti kórsetkish — zertteý sapasy. Bul turǵyda NU-dyń nátıjesi University of Geneva, University of Arizona jáne University of Rochester-pen salystyrýǵa turarlyq, bul ýnıversıtet zertteýleriniń yqpaly artyp kele jatqanyn kórsetedi.
«Eń aldymen NU qaýymdastyǵyn jáne búkil Qazaqstandy osy nátıjemen quttyqtaǵym keledi. Qazaqstandyq ýnıversıtet alǵash ret álemniń jetekshi ýnıversıtet reıtıńteriniń birinde osyndaı deńgeıge jetti. Bul — tek bizdiń ýnıversıtet úshin ǵana emes, eldiń joǵary bilim júıesi úshin de mańyzdy jetistik. Bul nátıjeniń artynda NU oqytýshylarynyń, zertteýshileriniń, stýdentteri men qyzmetkerleriniń kópjyldyq eńbegi tur. Ýnıversıtettiń, ǵylym men bilimniń damýyna óz eńbegimen úles qosyp júrgen árkimge alǵys aıtamyn», — dedi NU prezıdenti Vakar Ahmad.
NU-da oqýǵa degen qyzyǵýshylyq ta artyp keledi. Bıyl oqýǵa shamamen 12 myń adam ótinish bergen, al sheteldik stýdentterdi qabyldaý ýnıversıtet tarıhyndaǵy eń joǵary kórsetkishke jetti. Túlekterdiń jumysqa ornalasý deńgeıi joǵary bolyp qalyp otyr — 95%-dan astam.
Bul nátıjeler NU-dyń akademıalyq bedeliniń nyǵaıyp, Qazaqstanda jáne odan tys jerlerde ýnıversıtetke degen senimniń artqanyn kórsetedi. Halyqaralyq reıtıńterdegi ósim ýnıversıtettiń turaqty damýyn jáne jahandyq akademıalyq qaýymdastyqtaǵy róliniń artyp kele jatqanyn rastaıdy.
Aǵymdaǵy reıtıńte Qazaqstandy on ýnıversıtet tanystyrdy. Olardyń qatarynda S. J. Asfendıarov atyndaǵy Qazaq ulttyq medısına ýnıversıteti (1201–1400), ál-Farabı atyndaǵy Qazaq ulttyq ýnıversıteti (1401–1600), Q. I. Sátbaev atyndaǵy Qazaq ulttyq tehnıkalyq zertteý ýnıversıteti (1401–1600), L. N. Gýmılev atyndaǵy Eýrazıa ulttyq ýnıversıteti (1601–1800) bar.