Beısenbi kúni Nıgerıanyń soltústik-batysyndaǵy Sokoto shtatyndaǵy ózende qaıyq aýdarylyp, keminde 47 adam qaza tapty. Bul týraly sheneýnikter men turǵyndar habarlady. Oqıǵa shtattyń Goronıo aýdandyq ákimdigine qarasty Goraý qalashyǵynda boldy. Qaıyqta jumys isteý úshin fermalarǵa bara jatqan adamdar bolǵan.
Ulttyq ishki sý joldary basqarmasynyń Sokoto shtatyndaǵy menedjeri Abdýlkadır Iýsýftiń aıtýynsha, qaza tapqandar sany «ázirge» 47 adamdy quraıdy. Turǵyn Samaıla Garba (55 jasta) nemeresi 13 jastaǵy Djamıla Ýsmannyń da qaza tapqandar arasynda ekenin aıtty. Ol keminde 42 máıitti sanaǵanyn, olardyń kóbi áıelder men balalar ekenin jetkizdi.
«Bilesiz be, jańbyrly maýsymda áıelder men balalardyń kóbi fermada jumys isteýge barady», — dedi ol Associated Press agenttigine. Taǵy bir turǵyn Amıný Dan Hadjıa óziniń de osy sý jolymen fermaǵa baratynyn jáne sol qaıyqta bolmaǵanyna baqytty sanaıtynyn aıtty. «Shynynda, qaýymdaǵy árbir úı derlik zardap shekti», — dedi ol.
Nıgerıada qaıyq apattary jıi bolyp turady, ásirese jańbyrly maýsymda. Qaýipsizdik erejeleriniń saqtalmaýy qutqarý keýdesheleri joq aqaýly qaıyqtardyń paıdalanylýyna jol beredi. Qańtar aıynda Iobe shtatynda osyǵan uqsas apattan keminde 25 adam qaza tapqan bolatyn.