Shymkent qalalyq aýdanaralyq sotynda 21 jastaǵy Nuraı Serikbaıdyń ólimine baılanysty is qaralýyn jalǵastyrýda. Kezekti sot otyrysynda jábirlenýshi taraptyń ókili sottalýshy Sherhan Aımahanǵa qoıylǵan talap-aryz kólemin jarıa etti, dep habarlaıdy infohub.kz saıty.
Otbasynyń advokaty Aıanhan Omarovtyń aıtýynsha, qaıtys bolǵan qyzdyń týystary jerleý rásimine, dinı joralǵylarǵa, 40 kúndik as berýge, qulpytas ornatýǵa jáne tergeý áreketteri men sot otyrystaryna únemi qatysýǵa baılanysty aıtarlyqtaı materıaldyq shyǵyndarǵa ushyraǵan.
Qujattarmen rastalǵan materıaldyq shyǵyn somasy 14 mln 739 myń teńgeni qurady. Sonymen qatar, otbasy moraldyq zıandy óteý týraly orasan zor talap qoıdy.
«Ata-ana jalǵyz qyzynan aıyryldy, olar ony súıispenshilik pen qamqorlyqpen ósirip, tárbıeledi. Aǵalary súıikti sińlisinen aıyryldy. Balasynan aıyrylǵan ata-ananyń qasireti men aýyrtpalyǵy olardy ómir boıy qaldyrmaıdy jáne eshqandaı materıaldyq ıgilikpen ótelmeıdi. Sottalýshy Aımahan Nuraıdy nekege turýǵa májbúrlegen... Eshqandaı aqshalaı ótemaqy Nuraıdy qaıtara almaıdy jáne keltirilgen shyǵyndy toltyra almaıdy», — dep atap ótti advokat Aıanhan Omarov.
Osyǵan baılanysty jábirlenýshi tarap sottalýshydan moraldyq zıandy óteý retinde 10 mlrd teńge óndirip alýdy suraıdy.