Nuraı Serikbaıdy óltirdi dep aıyptalǵan Sherhan Aımahan medısınalyq mekemede sanıtarlar tarapynan qysym kórgenin aıtty, dep habarlaıdy infohub.kz.
Agenttiktiń dereginshe, búgin Almaty sot saraptamasy ınstıtýtynyń sot-psıhıatrıalyq sarapshysy Temirlan Seıtekten jaýap alyndy. Onyń aıtýynsha, medısınalyq kartadaǵy dıagnozdarǵa qaramastan, sottalýshy qylmys jasaǵan kezde óz is-áreketin tolyq túsingen. Sarapshylar bul qorytyndyǵa kelý úshin qylmystyq istiń eki tomy men tergeý kezindegi bir beınejazba berilgenin túsindirdi. Aldyńǵy kórsetilimder jazbasha hattamalarda bolǵan.
Alaıda Sherhan Aımahan sarapshylarǵa berilgen beınejazba onyń Almatydan Shymkentke oralǵannan keıin qysymmen túsirilgenin málimdedi. Sondaı-aq ol Aqtastaǵy respýblıkalyq psıhıatrıalyq aýrýhanada bolǵan kezinde personal tarapynan qysym men kelekege ushyraǵanyn aıtty.
«Sanıtarlar: "Qaıtyp kel, áıtpese seniń máıitińdi ǵana alyp shyǵamyz" dedi. Meniń oıymsha, tolyqqandy saraptama bolǵan joq. Sender suraq qoıyp jatqanda, basqa qyzmetkerler shaı iship otyrdy. Men bul qorytyndymen kelispeımin», — dedi Sherhan Aımahan.
Bul shaǵymdarǵa sarapshy qorytyndy obektıvti tekserýge negizdelgenin, aýrýhanadaǵy qysym týraly málimdemeler tergeý organdarynyń quzyretinde ekenin aıtty.
Eske salaıyq, qaıǵyly oqıǵa 11 qańtarda Shymkentte bolǵan. Aıyptalýshylar laýazymynda Sherhan Aımahan kisi óltirý, stalkıng jáne nekege májbúrleý baptary boıynsha sot aldyna keldi.
Prokýror qylmystyń mán-jaıyn ashatyn aıyptaý aktisin oqydy. Tergeý derekteri boıynsha, Nuraı Serikbaıǵa 35 pyshaq jaraqaty salynǵan.
Sonymen qatar, qaza tapqan Nuraı Serikbaıdyń otbasy sottalýshydan 10 mlrd teńgeden astam materıaldyq jáne moraldyq shyǵyndy óteýdi talap etti.