Аралас жекпе-жек (ММА) бойынша ресейлік Усман мен Умар Нурмагомедовтар істері бойынша ұсталған қалған адамдармен бірге түрмеден босатылды, деп хабарлайды infohub.kz сайты.

NUR.KZ-тің Абу-Даби сот департаментіне сілтеме жасап хабарлауынша, оқиға 11 қарашада Біріккен Араб Әмірліктерінің астанасында болып, онда жаппай төбелес басталған. Қонақүй лоббиінде Усман Нурмагомедов бірнеше адаммен бірге Мераб Двалишвилиге артынан жақындап, оны шақырып, бетінен шапалақтаған. Осыдан кейін грузинге аяқпен соққы жасалған, ал төбелеске оның досы — балуан Саба Лазишвили араласқан.

Тексеру қорытындысы бойынша екі Нурмагомедовты қоса алғанда сегіз адам жарты жылға қамауға алынып, 300 мың дирхам айыппұл салынған, кейін олар БАӘ-ден шығарылатын болған. Двалишвили мен Лазишвили бостандықта қалды, бірақ олардың әрқайсысына 50 мың дирхамнан айыппұл салынды.

Кейінірек, 14 қарашада UFC-дің грузин экс-чемпионы жоспарланғандай Абу-Дабидегі RAF балуандар лигасының турнирінде өнер көрсетті. Онда ол ұсталғандарды босатуды сұрады.

Сот департаменті 17 қарашада тараптар келісімге келгенін ресми түрде мәлімдеді. Сондай-ақ зардап шеккендердің Абу-Даби үкіметіне рақымшылық жасауды сұраған өтініші де қаралды.

Соңында үкім жеңілдетілді. Сегіз адамның бәрі түрмеден босатылып, әрқайсысына 150 мың дирхамнан (шамамен 18 миллион теңге) айыппұл салынды.