Ótken aptada Ombyda qurylys nysanynda bolǵan iri órt saldarynan eki adam qaza taýyp, olardyń biri Qazaqstan azamaty bolǵany belgili boldy. Bul aqparatty QR Syrtqy ister mınıstrligi rastady, dep habarlaıdy infohub.kz.
RBK-nyń Omby oblysy TJM baspasóz qyzmetine silteme jasap habarlaýynsha, 15 tamyzda Ombydaǵy Sharonov kóshesinde salynyp jatqan kópqabatty turǵyn úıde órt shyqqan. Órt birinshi qabatta qurylys materıaldarynyń tutanýynan bastalyp, tez arada joǵarǵy qabattarǵa taraǵan.
TASS derekterine sáıkes, tótenshe jaǵdaı saldarynan segiz adam zardap shekti. Olardyń barlyǵy ártúrli dárejedegi kúıik alǵan — dene betiniń 20-90 paıyzy — jáne aýyr jaǵdaıda reanımasıaǵa jatqyzyldy. Búgin agenttik órt eki adamnyń ómirin qıǵanyn habarlady. Qaza tapqandardyń biri — 2002 jyly týǵan Qazaqstan azamaty, ol denesiniń 70 paıyzy kúıikpen aýrýhanada jatqan.
NUR.KZ tilshisi QR Syrtqy ister mınıstrligine suraq joldady. Vedomstvo qazaqstandyqtyń Ombydaǵy órt saldarynan 18 tamyzda qaıtys bolǵanyn rastady.
QR SİM baspasóz qyzmetinde: «Qazaqstannyń Omby qalasyndaǵy Bas konsýldyǵy qajetti konsýldyq-quqyqtyq kómek kórsetýde, onyń ishinde qujattardy resimdeýge jáne azamattyń qazasyna baılanysty reseılik quzyretti organdarmen ózara is-qımyl jasaýǵa kómektesýde», — dep qosty.
Mınıstrlik qaıtys bolǵan azamattyń otbasymen baılanysta ekenin jáne óz quzyreti sheńberinde qajetti kómek kórsetip jatqanyn atap ótti.