Ońtústik Koreıanyń ońtústik-shyǵysyndaǵy Kónsan provınsıasynda nóserli jańbyr saldarynan júrgen kóshkin bir adamnyń qazasyna, eki adamnyń jaraqat alýyna sebep boldy. Bul týraly infohub.kz saıty habarlaıdy.
Dúısenbi tańerteń Kodje qalasyndaǵy turǵyn úı kesheniniń birinshi qabatyn kóshkin basyp qalǵan. Qutqarýshylar úsh adamdy qıraǵan úıindilerdiń astynan alyp shyqty, alaıda olardyń biri keıinnen qaıtys boldy dep jergilikti BAQ habarlady.
Bul apat Qytaı, Japonıa jáne Fılıppınniń keıbir aımaqtarynda rekordtyq jańbyrdan týyndaǵan sý tasqyny men kóshkinder tirkelgen kezeńge sáıkes kelip otyr. Kodje qalasynda bir saǵat ishinde 124,5 mıllımetr jaýyn-shashyn túsken, bul Ońtústik Koreıanyń meteorologıalyq agenttigi 1972 jyldan beri júrgizip kele jatqan baqylaý tarıhyndaǵy eń joǵary kórsetkish bolyp tabylady.
Jeksenbiden dúısenbige qaraǵan túni Kodjede 400 mıllımetrden astam jańbyr jaýdy. Áleýmettik jelilerde tasqyn sý kóshelerdi shaıyp, kólikterdi sý astynda qalǵanyn kórsetetin vıdeolar tarady. Qala ákimdigi qatty jańbyrǵa baılanysty dúısenbide keıbir týrısik nysandardyń jabylatynyn málimdedi.
Sondaı-aq, sý basqan nemese zaqymdalǵan joldarǵa baılanysty avtobýs qatynasy men turmystyq qaldyqtardy jınaý ýaqytsha toqtatyldy. Jeksenbi kúni bılik turǵyndardy kólikpen júrýden bas tartýǵa, ózen jaǵalaýlary sıaqty qaýipti jerlerden aýlaq bolýǵa jáne qajet bolǵan jaǵdaıda qaýipsiz aımaqtarǵa evakýasıalanýǵa shaqyrdy.