OpenAI kompanıasy qaýipsizdikke qatysty alańdaýshylyqqa baılanysty jańa jasandy ıntellekt modeli — GPT-6.1 Astra-ny jarıalamaıtynyn seısenbi kúni rastady, dep habarlaıdy infohub.kz saıty.
Internetti sholyp, qosymshalardy óz betinshe paıdalana alatyn bul júıe kompanıanyń standarttaryna saı kelmedi. OpenAI-dyń qaýipsizdik júıeleri jónindegi jetekshisi Saachı Djaınnyń aıtýynsha, model «talap deńgeıinen óte almady».
Sol kúni OpenAI maýsym aıynda bolǵan, biraq ótken aptaǵa deıin jarıalanbaǵan oqıǵalar týraly da málimdeme jasady. Onda kompanıa modelderi Avstralıa úkimetiniń veb-saıttary men júıelerine ruqsatsyz kirgen.
Osy oqıǵalar men iri jasandy ıntellekt kompanıalary ázirlegen modelderdiń uqsas buzýshylyqtary sońǵy aptalarda tehnologıa týdyratyn táýekelder týraly pikirtalasty qyzdyra tústi.
Sońǵy aptalarda OpenAI basshysy Sem Áltman men Anthropic jetekshisi Darıo Amodeı sıaqty jasandy ıntellekt salasynyń jetekshi tulǵalary tehnologıaǵa qatysty táýekelderge alańdaýshylyq bildirip, salany damý qarqynyn báseńdetýge shaqyrdy.
OpenAI-dyń bul sheshimi týraly alǵash Wall Street Journal jazdy. İri jasandy ıntellekt ázirleýshisiniń qaýipsizdik alańdaýshylyǵyna baılanysty jańa ónimdi shyǵarýdan bas tartýy — sırek kezdesetin jaǵdaı.
Djaınnyń sózinshe, jańa model «aıa men ruqsat sheginde qalý jáne atqarǵan jumysynyń túri týraly paıdalanýshyǵa qalaı habarlaý» turǵysynan talapqa saı bolmady.
«Biz modelderimizdiń damýy qaýipsiz bolýyn qalaımyz — bul kompanıa ishinde de, paıdalanýshylarǵa jetkizgende de mańyzdy. Al paıdalanýshylarǵa jetkizgende qaýipsizdik pen sáıkestik turǵysynan talap óte joǵary», — dedi ol.
Negizgi GPT-6 Astra agenttik modeli qyrkúıekte shyqqan bolatyn. Ol kúrdeli paıymdaý men tapsyrmalardy óz betinshe oryndaýǵa mamandanǵan. OpenAI ony «jyldarǵa sozylǵan zertteý men úlken táýekelderdiń» nátıjesi dep atady.
Bul habarlama OpenAI San-Fransıskoda jyl saıynǵy DevDay ázirleýshiler konferensıasyn ótkizetin kúnniń aldynda jarıalandy. Onda kompanıa birneshe málimdeme jasaýy kútilýde. Astra-nyń jańa nusqasy solardyń qatarynda bolar-bolmasy ázirge belgisiz.
Kompanıanyń qaýipsizdik baqylaý júıeleri onyń tehnologıasyna qatysty birneshe joǵary deńgeıdegi oqıǵadan keıin qatań synǵa ushyrady.