Oralda dárigerlerdiń biliktilik emtıhanyn qashyqtan qol jetkizý baǵdarlamalary arqyly tapsyrýdy uıymdastyrǵan azamattar tobyna qatysty úkim shyǵaryldy. Búdjetke keltirilgen zalal 16 mıllıon teńgeden asty, alaıda sottalǵandar amnıstıa boıynsha jazadan bosatyldy, dep habarlaıdy infohub.kz saıty.
«Moı gorod» aımaqtyq basylymynyń habarlaýynsha, Oral qalalyq soty tórt jergilikti turǵyndy qashyqtan qol jetkizý baǵdarlamalary arqyly medısına qyzmetkerleriniń biliktilik testterin tapsyrýdy uıymdastyrǵany úshin kináli dep tanydy.
Batys Qazaqstan oblystyq sotynyń baspasóz qyzmetiniń málimetinshe, 2018-2025 jyldar aralyǵynda oblystyq juqpaly aýrýlar aýrýhanasynyń burynǵy dırektory qyzmetin atqarǵan «Ulttyq táýelsiz emtıhan ortalyǵynyń» (UTEO) aımaqtyq sarapshysy exam.ncie.kz júıesinde qylmystyq sqema uıymdastyrǵan. Ol iske óziniń kómekshisin jáne eki IT-mamandy tartqan.
Sarapshy men onyń kómekshisi medısına qyzmetkerleri arasynan kandıdattar izdep, olardan aqsha jınap, kiristi bólisken. IT-mamandar AnyDesk jáne Radmin baǵdarlamalary arqyly emtıhan kezinde kompúterlerge qashyqtan qosylyp, materıaldardy kóshirip, dárigerlerdiń ornyna durys jaýaptardy engizgen. Sot derekteri boıynsha, nátıjelerdi burmalaǵany úshin top músheleri dárigerler men medpersonaldan 4 mıllıon teńgeden astam aqsha alǵan.
Basylymnyń atap ótýinshe, naqty bilimin rastamaǵan medısına qyzmetkerleri zańsyz biliktilik sanattary men sertıfıkattar alǵan. Olardyń negizinde búdjetten jáne jumys berýshilerdiń qarajatynan olarǵa 16,5 mıllıon teńge kóleminde jalaqyǵa qosymsha tólemder tólengen. Sonymen qatar, UTEO-ǵa repýtasıalyq jáne qarjylyq zıan keltirilgen.
«Sottalýshylar kinásin tolyq moıyndap, ókingen, is qysqartylǵan tártipte qaraldy (qylmys aýyrlyǵy shamaly sanatqa jatady). Uıymdastyrýshyǵa 1 jyl bas bostandyǵyn shekteý jazasy taǵaıyndalyp, densaýlyq saqtaý salasyndaǵy mamandardyń biliktiligin baǵalaý qyzmetimen aınalysý quqyǵynan 1 jyl merzimge aıyryldy. Úsh sybaılasqa – 1 jyldan bas bostandyǵyn shekteý jazasy taǵaıyndaldy. Alaıda tórteýi de amnıstıa boıynsha negizgi jazadan (bas bostandyǵyn shekteý) bosatyldy», – delingen habarlamada. Úkim zańdy kúshine engen joq.