Астанада Орал облысы бойынша Мемлекеттік кірістер департаменті басқармасының бұрынғы міндетін атқарушы басшысына және параны тапсыруға делдал болған азаматқа қатысты айыптау үкімі шықты, деп хабарлайды infohub.kz сайты.
Астана соттарының баспасөз қызметінің мәліметінше, 4 қарашада Астана қаласының қылмыстық істер жөніндегі мамандандырылған ауданаралық соты Орал облысы бойынша Мемлекеттік кірістер департаменті басқармасының бұрынғы міндетін атқарушы басшысы (Р.) мен азамат К.-ге қатысты айыптау үкімін шығарды. Олар ерекше ірі мөлшерде пара алу және парақорлыққа делдал болу бойынша айыпталды (Қазақстан Республикасы Қылмыстық кодексінің 366-бабының 4-бөлігі, Қазақстан Республикасы Қылмыстық кодексінің 368-бабының 1-бөлігі).
«2025 жылдың қыркүйек-қазан айларында басқарма басшысының міндетін атқарушы қызметін атқарған Р. Ресей Федерациясының азаматымен Орал облысы аумағындағы өткізу пункттері арқылы жүк көліктерін кедергісіз өткізгені үшін пара алу туралы келісімге келді. Жалпы қамқорлық пен қолдау көрсеткені, сондай-ақ жүк көліктерінің Ресейден Қазақстанға кедергісіз өтуіне жәрдемдескені үшін лауазымды тұлғаға 100 млн теңге берілді. Жалпы алғанда, 1003 жүк көлігін өткізу туралы сөз болды», — делінген сот хабарламасында.
Сонымен қатар, пара беруші өзі пайдаланатын заңды тұлғалар мен жеке кәсіпкерлердің тәуекелдерді басқару жүйесіне енгізілгені туралы ақпарат, сондай-ақ туындаған шектеулерді айналып өту жөнінде ұсынымдар алғаны атап өтілді.
«К. ақша қаражатын тапсыруға делдал болып, өз қызметі үшін 24,8 млн теңге алды», — делінген сот хабарламасында.
Мемлекеттік айыптаушы Р.-ны Қылмыстық кодекстің 366-бабының 4-бөлігі бойынша кінәлі деп танып, оған мүлкін тәркілеумен және белгілі бір лауазымдарды атқару құқығынан өмір бойы айырумен 12 жылға бас бостандығынан айыру жазасын тағайындауды сұрады. К.-ге қатысты прокурор мүлкін тәркілеумен және белгілі бір лауазымдарды атқару құқығынан өмір бойы айырумен 1 жыл 6 айға бас бостандығынан айыру жазасын тағайындауды сұрады.
Сот Қылмыстық кодекстің 366-бабының 4-бөлігінің санкциясы мүлкін тәркілеумен және белгілі бір лауазымдарды атқару немесе белгілі бір қызметпен айналысу құқығынан өмір бойы айырумен 10 жылдан 15 жылға дейінгі мерзімге бас бостандығынан айыру жазасын көздейтінін атап өтті. Қылмыстық кодекстің 368-бабының 1-бөлігінің санкциясы пара сомасына еселенген айыппұл не мүлкін тәркілеумен және белгілі бір лауазымдарды атқару немесе белгілі бір қызметпен айналысу құқығынан өмір бойы айырумен 3 жылға дейінгі мерзімге бас бостандығынан айыру жазасын көздейді.
«Сот екі сотталушыға қатысты жазаны жеңілдететін мән-жай ретінде кәмелетке толмаған балаларының болуын таныды. Р. үшін жазаны ауырлататын мән-жай — қылмыстық құқық бұзушылықты өзі қабылдаған антты бұзған адам жасағаны деп танылды. К.-ге қатысты ауырлататын мән-жайлар анықталмады», — деп хабарлады сотта.
Р. Қылмыстық кодекстің 366-бабының 4-бөлігі бойынша кінәлі деп танылып, мүлкін тәркілеумен және белгілі бір лауазымдарды атқару құқығынан өмір бойы айырумен 10 жылға бас бостандығынан айырылды. К. Қылмыстық кодекстің 368-бабының 1-бөлігі бойынша кінәлі деп танылып, мүлкін тәркілеумен және белгілі бір лауазымдарды атқару құқығынан өмір бойы айырумен 1 жыл 6 айға бас бостандығынан айырылды.
Сондай-ақ сот қылмыстық жолмен табылған деп танылған ақша қаражатын мемлекет кірісіне тәркілеуге және сотталғандардан заңсыз алынған ақша қаражатын өндіріп алуға шешім қабылдады. Үкім заңды күшіне енген жоқ.