Oralda azyq-túlik dúkenine jasalǵan tonaý kezinde kúdikti izin sýytpaı ustaldy. Kasadan 100 myń teńgege jýyq aqsha jymqyrylǵan, dep habarlaıdy infohub.kz.
Polisia.kz portalynyń málimetinshe, «102» arnasyna Oraldaǵy azyq-túlik dúkenderiniń biriniń ıesinen tonaý týraly habarlama túsken. Belgisiz er adam pyshaqpen qorqytyp, kasadan 100 myń teńgege jýyq aqshany alyp, izin jasyrǵan. Shabýyl kezinde saýda zalynda dúken ıesi men onyń tanysy bolǵan. Polısıanyń kadrlaryna qaraǵanda, qylmysker neılon shulyqtan jasalǵan betperde kıgen.
Oqıǵa ornyna kelgen polısıa qyzmetkerleri jedel-izdestirý sharalaryn júrgizdi. Beınebaqylaý kameralarynyń jazbalary zerttelip, kúdiktiniń qozǵalys baǵyty anyqtaldy, sodan keıin irgeles aýmaqty qamtý uıymdastyryldy. İzdeý barysynda polıseıler pyshaqtyń japsyrmasyn taýyp, odan ári izdeý baǵytyn naqtylady. Aýmaq birneshe sektorǵa bólinip, jedel-izdestirý sharalary jalǵasty.
Aýmaqtyń bir bóligin tekserý kezinde polısıa qyzmetkerleri shóp arasynda jasyrynyp, qashýǵa tyrysqan er adamdy baıqady. Onyń jeke basyn anyqtaýǵa tyrysqanda, kúdikti qarýly qarsylyq kórsetip, polıseılerge pyshaqpen shabýyl jasady. Polısıa qyzmetkerleriniń kásibı, batyl jáne úılesimdi áreketteriniń arqasynda qylmysker dereý zalalsyzdandyrylyp, ustaldy. Oqıǵa saldarynan eshkim zardap shekken joq.
Ustalǵan adam — 29 jastaǵy er adam. Ol ýaqytsha ustaý ızolátoryna qamaldy. Tonaý faktisi boıynsha sotqa deıingi tergeý júrgizilýde. Kúdiktiniń basqa da qylmystarǵa qatysy bar-joǵy tekserilýde.