Óskemende polısıa qyzmetkerleri 25 jastaǵy jergilikti turǵyn jasaǵan qylmystar serıasyn ashty. Er adam bóten Mazda kóligin metalolomǵa tapsyryp, keıin taǵy bir kólikti urlap ketken, dep habarlaıdy infohub.kz saıty.
İshki ister mınıstrliginiń aqparattyq medıaportalynda habarlanǵandaı, qylmyskerdiń alǵashqy qurbany Mazda Cronos ıesi bolǵan. Bul kólik turǵyn úıdiń aýlasynda uzaq ýaqyt turǵan. Er adam kólikke eshqandaı quqyǵy bolmasa da, mobıldi qosymsha arqyly evakýator shaqyryp, kólikti alyp ketip, metal qabyldaý pýnktine tapsyrǵan.
«Osy úshin qylmysker 35 myń teńge alǵan. Iesine shamamen 1 mln teńge kóleminde shyǵyn keltirilgen», — delingen habarlamada.
Bir aptadan keıin er adam taǵy da qylmys jasaǵan. Qonaqta júrip, ol dálizde qaldyrylǵan LADA 21703 kiltterin baıqap, olardy alyp, ıesiniń ruqsatynsyz kólikpen ketip qalǵan.
«Sonymen qatar, kúdiktiniń buǵan deıin jeti jyl merzimge kólik júrgizý quqyǵynan aıyrylǵany anyqtaldy. Patrúldik polısıa qyzmetkerleri kólikti toqtatqan kezde medısınalyq kýálandyrý onyń esirtkilik masań kúıde ekenin rastady — aǵzasynan kannabınoıdtar tabylǵan», — dep qosty polısıada.
Kúdiktige qatysty qylmystyq ister qozǵaldy. Ol ýaqytsha ustaý ızolátoryna qamaldy.
Polısıa bóten múlikti zańsyz ıelený jáne masań kúıde kólik júrgizý zańda kózdelgen jaýapkershilikke ákep soǵatynyn eskertti.