Zeınetaqy jınaqtarynyń artyǵyn turǵyn úı salymdaryna salǵan qazaqstandyqtar endi alty jyldan keıin bul qarajattyń Biryńǵaı jınaqtaýshy zeınetaqy qoryna (BJZQ) avtomatty túrde qaıtarylýynan qoryqpaıdy — tıisti ereje kúshinen alyndy, dep habarlaıdy infohub.kz saıty.
Buǵan deıin zeınetaqy artyǵyn alyp, «Otbasy bankindegi» turǵyn úı salymyna salǵan azamattar alty jyl ishinde baspana alýǵa mindetti bolatyn. Osy ýaqytta turǵyn úı satyp alynbasa, jınaq BJZQ-daǵy shotqa qaıtarylatyn.
Alaıda «Otbasy bankinde» málimdegendeı, bul shartty alyp tastaýǵa sheshim qabyldandy. «Endi aqshany BJZQ-ǵa qaıtarýdyń qajeti joq. Engizilgen ózgeristerge sáıkes, alty jyl ótkennen keıin de qarajat "Otbasy bankindegi" salymyńyzda qalady», — delingen «OTBASY NEWS – Otbasy bank jańalyqtary» resmı Telegram-arnasynda.
Osylaısha, qazaqstandyqtar alty jyldyq merzim ótti degen jeleýmen jınaqtary BJZQ-ǵa avtomatty túrde qaıtarylady dep alańdamaýy kerek. Sonymen qatar bankte azamattarǵa jeke baspana alýdy keıinge qaldyrmaýdy jáne múmkindiginshe jınaqtaryn ıpotekanyń bastapqy jarnasy retinde paıdalanýdy usyndy.
Aıta keteıik, turǵyn úı salymdarynan zeınetaqy artyǵyn alý áli de múmkin emes, al salymdy japsańyz, qarajat BJZQ-ǵa qaıtarylady. Keıbir jaǵdaılarda qazaqstandyqqa eseptelgen memlekettik syılyqaqy da «janyp» ketedi.