Pragada ótken Oktagon 92 týrnırinde ózbekstandyq aralas jekpe-jek sheberi Mahmýd Mýradov chempıondyq jekpe-jekte áserli jeńiske jetti, dep habarlaıdy infohub.kz.
Sportshy shoýdyń basty jekpe-jeginiń aldyndaǵy kezdesýde óner kórsetip, jartylaı aýyr salmaqta (93 kelige deıin) debút jasady. Onyń qarsylasy ırlandıalyq Ýıll Flerı boldy.
Bes raýndqa josparlanǵan jekpe-jek merziminen buryn aıaqtaldy: ekinshi kezeńniń basynda-aq Mýradov qarsylasyn nokaýtqa jiberdi. Osylaısha, 36 jastaǵy ózbekstandyq Flerıden chempıondyq belbeýdi tartyp alyp, Oktagon-nyń jartylaı aýyr salmaqtaǵy jańa chempıony atandy.
Aıta keteıik, Mýradov aldyńǵy jekpe-jeginde orta salmaqta ýaqytsha belbeýge ıe bolǵan edi. UFC-den ketkennen keıin ol tórt jekpe-jektiń barlyǵynda jeńiske jetti. Onyń kásibı mansabynda barlyǵy 30 jeńis, 8 jeńilis jáne bir jekpe-jek ótpeı qalǵan.
Ýıll Flerı úshin bul jeńilis qatarynan alty jeńisten turatyn serıany úzdi. 37 jastaǵy ırlandıalyq Oktagon-nyń aýyr salmaqtaǵy chempıon ataǵyn saqtap qaldy. Onyń enshisinde 17 jeńis, 4 jeńilis jáne bir nátıjesiz jekpe-jek bar.
Eske salaıyq, Oktagon eýropalyq lıgasynyń eń jeńil salmaqtaǵy chempıony — qazaqstandyq faıter Jalǵas Jumaǵulov.