Armenıa premer-mınıstri Nıkol Pashınán eldiń Eýropalyq odaqqa kirý prosesinen bas tartpaıtynyn málimdedi, dep habarlaıdy infohub.kz saıty.
News.am-nyń habarlaýynsha, Pashınán Erevannyń EO-ǵa qosylý týraly kelissózderdi bastaý týraly zańdy keri qaıtarýdy kózdemeıtinin taǵy da atap ótti. Onyń aıtýynsha, bul zańdy qabyldaý bastamasy azamattyq qoǵamnan shyqqan.
Premer Belarýs prezıdenti Aleksandr Lýkashenkonyń jaqynda aıtqan pikirine de túsinikteme berdi. «Bul zańnyń qabyldanýy durys qadam boldy. Al júrip jatqan prosesti men oń baǵalaımyn. Qazir kim: "Bul Armenıa kimge kerek? Onyń barar jeri joq" dep aıtyp júr? Al zań qabyldanǵanǵa deıin mundaı málimdemeler oryn alǵan bolatyn», — dedi Pashınán.
Ol Armenıa syrtqy saıasatta aıtarlyqtaı tabystarǵa jetkenine senimdi jáne bul, eń aldymen, osy zańnyń arqasynda. «Seriktester bar, olar: "Múmkin, ony keri qaıtarasyzdar" deıdi. Men buǵan únemi jaýap beremin: bul múmkin emes. Óıtkeni bul jerde tek parlamenttiń ǵana emes, armán halqynyń da saıası erki bar», — dep atap ótti úkimet basshysy.
Eske salaıyq, Aleksandr Lýkashenko 2024 jylǵy 20 tamyzdaǵy suhbatynda: «Armándar bizden basqa kimge kerek? Olar eshkimge kerek emes. Óz ekonomıkalaryn damytyp, ózderinde bar nársege súıensin», — degen bolatyn.
Pashınán buǵan eki jyldan keıin jaýap berdi. 2026 jyldyń shilde aıynyń sońynda ol Erevan Lýkashenkonyń Armenıa kimge kerek degen suraǵyna jaýap tapqanyn málimdedi.