Telegram-nyń negizin qalaýshylardyń biri Pavel Dýrov RF QK boıynsha terorızmge járdemdesýge kúdikti. Alaıda Memlekettik Dýmanyń aqparattyq saıasat komıtetiniń tóraǵasy Sergeı Boıarskı bul aıyptyń Roskomnadzordyń messendjerge qatysty talaptaryna esh qatysy joq ekenin aıtty, dep habarlaıdy infohub.kz.
Boıarskıdiń aıtýynsha, Reseı bıligi Telegram-ǵa zań talaptaryn oryndamaǵany úshin kópten beri talap qoıyp keledi. Ol «Bıznes FM»-ge bergen suhbatynda: «Telegram messendjerine qatysty birqatar talaptar bar. Olar Reseı zańdaryn júıeli túrde buzyp keledi, sondyqtan sońǵy jańalyqtardyń retteýshiniń platformany zańdy talaptardy oryndaýǵa májbúrleý saıasatyna esh qatysy joq», – dep málimdedi.
Depýtat Dýrovqa qoıylǵan aıyp pen Telegram-ǵa qoıylǵan talaptardy birdeı másele dep sanamaıtynyn, sondaı-aq qylmystyq istiń mán-jaıyn tereń zerttemegenin moıyndady.
Al advokat Vladımır Jerebenkovtyń TASS-qa bergen málimetinshe, Dýrovtyń kinási dáleldengen jaǵdaıda oǵan Reseıde ómir boıy bas bostandyǵynan aıyrylý qaýpi tónip tur.
Memlekettik Dýmanyń aqparattyq saıasat komıteti tóraǵasynyń orynbasary Andreı Svınsovtyń pikirinshe, Telegram ókildik ashyp, derbes derekterdi el ishinde saqtap óńdeıtin bolsa, sondaı-aq terorızmge qarsy is-qımyl máselelerinde arnaıy qyzmettermen ózara is-qımyl jasasa, Reseıde zańdy túrde jumysyn jalǵastyra alady.
Buǵan deıin Reseı FSB Dýrovty RF QK 205.1-babynyń 1.1-bóligi (terorıstik áreketke járdemdesý) boıynsha aıyptap, ony halyqaralyq izdeýge jarıalaǵan bolatyn. Arnaıy qyzmettiń nusqasy boıynsha, Telegram ákimshiligi ýkraındyq arnaıy qyzmetter Reseı aýmaǵynda dıversıalar, terrorlyq shabýyldar, jappaı qantógis jáne kıberalaıaqtyq daıyndaý úshin paıdalanǵan delinetin arnalardy, chattar men bottardy joımaǵan. FSB bul resýrstardyń áreketi adam shyǵynyna jáne mıllıardtaǵan shyǵynǵa ákelgenin alǵa tartady.
Maqala jazylǵan kezde Pavel Dýrov pen Telegram ókilderi Reseı bıliginiń aıyptaýlaryna qatysty resmı túsinikteme bermegen bolatyn.