Pavlodar áýejaıy ushý-qoný jolaǵy aýqymdy rekonstrýksıadan ótken soń Astanadan alǵashqy reısti qabyldady, dep habarlaıdy infohub.kz saıty.
Astanamen jáne Almatymen turaqty áýe qatynasy qalpyna keltirildi. Áýejaıdyń tolyqqandy jumysyn qaıta bastaýy úshin barlyq qajetti ruqsat qujattary men sertıfıkattar alyndy. 17 tamyzda avıasıalyq qaýipsizdik qyzmeti sertıfıkattalsa, 21 tamyzda áýejaı aerodromnyń jaramdylyq sertıfıkatyn aldy, dep habarlaıdy Pavlodar oblysy ákimdiginiń baspasóz qyzmeti.
Ushý-qoný jolaǵynyń rekonstrýksıasy memleket basshysy Qasym-Jomart Toqaevtyń tapsyrmasyna sáıkes júrgizilip, Pavlodar oblysynyń basty ınfraqurylymdyq jobalarynyń birine aınaldy. Jobany iske asyrýǵa 16,4 mlrd teńge baǵyttaldy, onyń ishinde 9,3 mlrd teńge — Arnaıy memlekettik qor qarajaty.
Jumys barysynda ushý-qoný jolaǵy tolyq jańartyldy: onyń eni 45 metrden 60 metrge deıin ulǵaıtyldy. Sonymen qatar, jaryq sıgnaldyq jabdyq pen jaryqtandyrý júıeleri jańǵyrtylyp, beınebaqylaý júıesi jańartylyp, aerodrom perımetri boıynsha jańa qorshaý ornatyldy. Nátıjesinde Pavlodar qazirgi avıasıalyq qaýipsizdik talaptaryna sáıkes keletin jáne áýe kemeleriniń keń aýqymyn qabyldaýǵa múmkindik beretin zamanaýı aerodromdyq ınfraqurylymǵa ıe boldy.
Aerodromdy qaıta jańartýmen qatar, Pavlodar oblysynyń ákimdigi turaqty áýe qatynasyn qalpyna keltirý jáne keńeıtý boıynsha jumys júrgizdi. Vietjet Qazaqstan Astanaǵa aptasyna 4 reıs, al FlyArystan Almatyǵa kúndelikti reıster oryndaıtyn bolady. Baǵyttar jelisin keńeıtý jumystary jalǵasýda. SCAT áýekompanıasy Pavlodardan Aqtaýǵa, Shymkentke jáne Aqtóbege reıster ashý múmkindigin qarastyrýda. Centrum Air kompanıasymen 2027 jyldyń naýryzynan bastap «Pavlodar-Tashkent» baǵyty boıynsha halyqaralyq reıs ashý týraly aldyn ala kelisimge qol jetkizildi. Sonymen qatar, Máskeýge, Novosibirge, Úrimshige, Antaláǵa jáne Sharm-el-Sheıhke jańa baǵyttar ashý múmkindigi pysyqtalýda.
«Biz bul sátti kópten kúttik. Pavlodar oblysy úshin bul erekshe mańyzǵa ıe. Aımaqtyń geografıalyq ornalasýyn eskere otyryp, jańartylǵan ınfraqurylym onyń tranzıttik áleýetin arttyrady. Eń bastysy — biz turaqty reısterdi qaıtardyq, búgin ushaqtar Pavlodardy Astanamen jáne Almatymen baılanystyryp tur. Endi oblys turǵyndarynyń issapar jáne saıahat múmkindikterin keńeıtý úshin ushý geografıasyn dáıekti túrde keńeıtemiz», — dep atap ótti Pavlodar oblysynyń ákimi Asaıyn Baıhanov.
Sonymen qatar, áýejaıdyń damýy aerodromdy qaıta jańartýmen aıaqtalmaıdy. Oblys ákimdigi kelesi aýqymdy kezeńdi — áýejaı ǵımaratyn rekonstrýksıalaýdy daıyndady. Joba termınaldyń ótkizý qabiletin saǵatyna 200-den 300 jolaýshyǵa deıin arttyrýdy, ishki jáne halyqaralyq jolaýshylar aǵyndaryn bólýdi, bagajdy óńdeý men tekserýdiń avtomattandyrylǵan júıesin ornatýdy, teleskopıalyq traptary bar 2 jolaýshylar galereıasyn salýdy, sondaı-aq ınjenerlik ınfraqurylymdy jańǵyrtýdy kózdeıdi. Termınaldyń rekonstrýksıasy áýejaı jumysyna áser etpeıtini mańyzdy. Turaqty reıster ádettegi rejımde oryndalatyn bolady.
Pavlodar aımaqtyq jáne halyqaralyq avıasıa kartasyna qaıta oralýda. Jańartylǵan ınfraqurylym áýe qatynasyn odan ári damytýǵa, iskerlik mobıldilik pen aımaqtyń týrısik áleýetine negiz jasaıdy.