Pavlodarda úsh jylǵa sozylǵan rekonstrýksıadan keıin 1956 jyldan beri jumys istep kele jatqan №1 qalalyq aýrýhana qaıta ashyldy. Óńirdegi eń iri medısınalyq ortalyqty jańartýǵa 12,3 mlrd teńge jumsaldy, dep habarlaıdy infohub.kz saıty.
Pavlodar oblysy ákimdiginiń málimetinshe, 70 jyldyq tarıhy bar bul emdeý mekemesi ondaǵan jyldar boıy kúrdeli jóndeý kórmegen. Jumys 2022 jyly bastalǵan.
«Aýrýhana kesheniniń jalpy aýdany 21 myń sharshy metrdi quraıdy, onyń 13 myń sharshy metri rekonstrýksıalandy. 2020 jyly ázirlengen joba jergilikti jáne respýblıkalyq búdjet qarajaty esebinen júzege asyryldy. Jumystardyń jalpy quny 12,3 mlrd teńgeni qurady, onyń 8,8 mlrd teńgesi medısınalyq jabdyq satyp alýǵa jumsaldy», – delingen habarlamada.
Rekonstrýksıa barysynda negizgi emdeý korpýstarynyń qasbetteri, tereze bloktary men ınjenerlik jeliler tolyǵymen jańartyldy. Elektrmen jabdyqtaý, jylýmen qamtamasyz etý, sýmen jabdyqtaý jáne káriz, medısınalyq gazdar, órt dabyly, telefon jáne jergilikti jeli júıeleri 100 paıyzǵa aýystyryldy.
Palatalarda jeke sanıtarlyq toraptar men dýsh kabınalary paıda boldy, al ınfeksıalyq qaýipsizdikti qamtamasyz etý úshin ár qabatta bólek jeldetý júıesi ornatyldy.
«Aýrýhana 1 319 birlik jańa medısınalyq jabdyq aldy, onyń ishinde rentgen qondyrǵysy, saraptamalyq klastaǵy ÝDZ apparattary jáne ońaltýǵa arnalǵan jabdyqtar bar. Eń mańyzdy satyp alýlardyń qatarynda – 7-býyndy angıograf jáne KCHP jabdyǵy», – dedi ákimdikte.
Buǵan deıin profılaktıkalyq medısına akademıasynyń prezıdenti Almaz Sharman álemdik tájirıbede 40–50 jyl paıdalanylǵan medısınalyq korpýstardy buzý qaýipsiz ekenin túsindirgen bolatyn.