Pavlodar oblysynyń ata-anasynyń qamqorlyǵynsyz qalǵan turǵyny 2008 jyldan — ıaǵnı balalar úıine túsken kezden bastap memlekettik baspana kezegine qaıta qosylýǵa qol jetkizdi. Sot ony jaýapty organdardyń tıisti jumys istemeýi saldarynan ýaqtyly esepke alynbaǵanyn anyqtap, bul áreketti zańsyz dep tanydy, dep habarlaıdy infohub.kz.
Sot málimetinshe, B. ata-anasynyń qamqorlyǵynsyz qalyp, 2008 jyly balalar úıine túsken. Alaıda ony jetim balalar men ata-anasynyń qamqorlyǵynsyz qalǵan balalar sanaty boıynsha baspana kezegine tek 2014 jyly ǵana qosqan.
2023 jyly ýákiletti organ ony basqa eldi mekenge turaqty turýǵa kóshkenin syltaýratyp, kezekten shyǵarǵan. Kezekte ótkizgen alty jyl eseptelmegen.
B. ózin 2008 jyldan, ıaǵnı balalar úıine túsken kezden bastap kezekke qaıta qosýdy talap etken. Birneshe ret ótinish bergenine qaramastan, ony tek 2014 jyldan bastap qana qaıta esepke alǵan. Sonda áıel sotqa júgingen.
İs qaraý barysynda kidiris onyń kinásinen bolmaǵany anyqtaldy. Balany ýaqtyly baspana kezegine qoıý mindeti qamqorshylyq fýnksıalaryn atqarǵan organdar men uıymdarǵa júktelgen.
«Sot B.-nyń qamqorshylyq fýnksıalaryn atqarǵan organdar men uıymdardyń óz mindetterin tıisinshe oryndamaýy saldarynan ýaqtyly kezekke qosylmaǵanyn anyqtady. Istestiń kesh esepke alynýyna kinási joq. Kámeletke tolmaǵandyqtan, ol óz betinshe baspana quqyǵyn júzege asyrý múmkindiginen aıyrylǵan», — delingen sot habarlamasynda.
Áıel tárbıelengen balalar úıi osy ýaqytqa deıin taratylyp ketken. Al ýákiletti organ is materıaldarynda atap ótilgendeı, jaǵdaıdyń quqyqtyq baǵasyna áser etetin dáleldemeler usynbaǵan.
Sot jetim balalar men ata-anasynyń qamqorlyǵynsyz qalǵan, baspanaǵa muqtaj dep tanylyp, esepke qoıylǵan balalar baspana alǵanǵa deıin kezekten shyǵarylmaıtynyn eske saldy. Sot laýazymdy tulǵalardyń is-áreketterinen ıstestiń konstıtýsıalyq quqyqtary men zańdy múddeleriniń buzylýyna ákelgen zańbuzýshylyqtardy anyqtady.
Nátıjesinde B.-nyń memlekettik turǵyn úı qorynan baspana alý quqyǵy balalar úıine túsken kúnnen bastap — 2008 jyldan qalpyna keltirildi. Sheshim zańdy kúshine endi.
Buǵan deıin «Kýrsıv» Otbasy bankinde eki qyzmetkerdiń zańsyz syıaqy úshin kezekte turǵan adamnyń sanatyn «balasy múgedek otbasylar» dep ózgertip, oǵan baspana alýdyń jeńildikti sharttaryna úmitker bolý quqyǵyn bergenin jazǵan bolatyn. Mámileni toqtatyp úlgergen, qyzmetkerler jumystan shyǵarylǵan, al materıaldar quqyq qorǵaý organdaryna berilgen. Bankte bul oqıǵa jekelegen jaǵdaı ekenin málimdegen.