Pavlodar oblysynda «Aqtogai Milk» JSHS aýmaǵyndaǵy káriz qudyǵynda alty adamnyń qaza bolýyna baılanysty úsh kúdikti ustaldy. Qaza tapqandardyń arasynda kámeletke tolmaǵan bala bar, taǵy bir adam aýrýhanaǵa jatqyzyldy, dep habarlaıdy infohub.kz saıty.
Buǵan deıin keıbir BAQ-ta Pavlodar oblystyq máslıhatynyń depýtaty, Aqtogai Milk fermasyna qatysy bar kásipker Aleksandr Terentevtiń ustalýy múmkin ekendigi týraly aqparat taraǵan edi. Alaıda Pavlodar oblysy polısıa departamentinde bul derekti tergeý qupıasyn alǵa tartyp, rastamady.
Polısıada sotqa deıingi tergeý amaldary júrgizilip jatqanyn habarlady. «Qylmystyq is aıasynda barlyq mán-jaıdy anyqtaýǵa baǵyttalǵan qajetti tergeý sharalary kesheni júrgizilýde. Qazirgi ýaqytta úsh kúdikti ustalyp, ýaqytsha ustaý ızolátoryna qamaldy», — dep málimdedi DP-da.
Ustalǵandardyń jeke basy jarıalanbaıdy, tergeýdiń basqa da málimetteri Qazaqstan Respýblıkasy Qylmystyq prosestik kodeksiniń 201-babyna sáıkes jarıa etilmeıdi.
Eske salaıyq, qaıǵyly oqıǵa Jolaman aýylynda boldy. Onda «Aqtogai Milk» JSHS sút fermasynyń aýmaǵyndaǵy káriz qudyǵynda jumys kezinde alty adam qaza tapty. Aldyn ala derekter boıynsha, jumysshylar elektr sorǵysyndaǵy aqaýdy joıýmen aınalysqan. Taǵy bir adam zardap shegip, aýyr jaǵdaıda aýrýhanaǵa jetkizildi.
Aleksandr Terentev qaza tapqandardyń otbasylaryna kóńil aıtyp, kásiporyn olarǵa qajetti kómek kórsetetinin ýáde etti.