Pavlodar turǵyny TJM qyzmetkerimen daýlasyp, 91 myń teńgege jýyq aıyppul arqalady. Oqıǵa 28 maýsym keshke Akademık Sátbaev kóshesindegi qaıyq stansasynda bolǵan, dep habarlaıdy infohub.kz.
Tótenshe jaǵdaılar departamenti qyzmetkerleri akvatorıany patrúldeý kezinde shamadan tys júktelgen qaıyqty baıqaǵan. Onda eki balany qosa alǵanda jeti adam bolǵan. Al qutqarý keýdesheleri tek eki jolaýshyda ǵana bolǵan. Toqtaý talabynan keıin qaıyq jaǵaǵa bet alǵan.
Sol jerde keme júrgizýshisine qyzmettik katerge ótip, medısınalyq kýálandyrýdan ótý usynylǵan, alaıda ol bas tartqan. Sonymen qatar, er adam qujattaryn kórsetýden jáne TJM qyzmetkeriniń zańdy talaptaryn oryndaýdan bas tartqan.
Sotta pavlodarlyq kinásin tolyq moıyndap, ókingen. Ol kamýfláj kıgen adamnyń shynymen TJM qyzmetkeri ekenine kúmándanǵandyqtan baǵynbaǵanyn túsindirgen.
Sot is materıaldaryn, proseske qatysýshylardyń túsiniktemelerin jáne oqıǵanyń beınejazbasyn zerdelegen. Nátıjesinde buzýshynyń kinási dáleldengen.
«Jaza taǵaıyndaý kezinde sot kináni moıyndaý men ókinýdi jeńildetetin mán-jaılar retinde eskerdi. Sot qaýlysymen er adam azamattyq qorǵaý organdary qyzmetkeriniń zańdy talabyna baǵynbaǵany úshin kináli dep tanyldy. Oǵan 90 825 teńge kóleminde ákimshilik aıyppul salyndy», — dep habarlady sotta.
Sot sheshimi zańdy kúshine engen.