Densaýlyq saqtaý mınıstrligi analar men náresteler arasyndaǵy aýrýhanaishilik ınfeksıalardyń aldyn alý maqsatynda Qazaqstandaǵy barlyq perınataldyq ortalyqtardy keshendi tekserýden ótkizedi. Bul týraly infohub.kz saıty habarlaıdy.
Vedomstvo basshysy Aqmaral Álnazarova tekserýlerdiń basty maqsaty aıyppul salý emes, táýekelderdi anyqtaý jáne joıý, sondaı-aq sanıtarlyq normalardyń saqtalýyna aýdıt júrgizý ekenin atap ótti. Mınıstrliktiń málimetinshe, 69 bosandyrý mekemesi 15 tamyzǵa deıin sanıtarlyq-epıdemıologıalyq baqylaý komıteti mamandarynyń kúshimen tekseriledi.
«Infeksıanyń árbir jaǵdaıy kásibı turǵyda taldanyp, pasıentterdiń qaýipsizdigin arttyrýǵa baǵyttalǵan sheshimder qabyldanýy tıis», — dedi Álnazarova.
Mınıstr sonymen qatar ınfeksıalyq jaǵdaılardy tergeýdiń qoldanystaǵy ádistemelerin qaıta qaraýdy, sanıtarlyq erejeler men memlekettik baqylaýdyń baqylaý paraqtaryn jańartýdy, profılaktıkaǵa jáne árbir oqıǵanyń sebepterin obektıvti baǵalaýǵa basa nazar aýdarýdy tapsyrdy. Óńirlik densaýlyq saqtaý basqarmalaryna medısınalyq uıymdardy dezınfeksıa jáne zararsyzdandyrý úshin qajetti resýrstarmen, jeke qorǵanys quraldarymen, zamanaýı jabdyqtarmen jáne bir ret qoldanylatyn shyǵys materıaldarymen qamtamasyz etý, sondaı-aq personaldy ınfeksıalyq baqylaý boıynsha oqytýdy uıymdastyrý tapsyryldy. Medısınalyq jáne farmasevtıkalyq baqylaý komıteti antıbıotıkterdi resept boıynsha bosatý talaptarynyń saqtalýyn qadaǵalaýdy kúsheıtedi.
Tekserýlerdiń qorytyndysy boıynsha ár óńirde ınfeksıalyq baqylaý júıesin odan ári jetildirý boıynsha jol kartalary bekitilmek. Buǵan deıin Qazaqstanda ekstremaldy ystyqtyń júkti áıelder men nárestelerdiń jaǵdaıyna áserin zertteý josparlanǵany habarlanǵan bolatyn.