Petropavlda ınklúzıvti ortalyq salyp jatqan jumysshylar jerden adam súıekterin shyǵaryp jatyr. Qazba jumystary kezinde topyraq astynan súıekter, bas súıekter, aǵash tabyttardyń synyqtary, shegeler men krester shyǵýda. Keıbir qańqalar tolyq derlik saqtalǵan, al kýágerlerdiń aıtýynsha, tabylǵandar arasynda balalardyń súıekteri de kezdesedi, dep habarlaıdy infohub.kz saıty.
Beınejazbalardyń birinde ekskavator júrgizýshisi jumysshylar birneshe tabyt tapqanyn aıtady. Tabylǵan súıekterdi olar qolmen jınap, qaptarǵa salyp jatyr.
«Búgin kezdeısoq tabytty ashyp qoıdym. Ol jalǵyz emes. Meniń kómegimmen jigitter besinshi tabytty alyp jatyr. Qudaıym, keshir. Súıekke toly qap. Munda tabyt ústine tabyt. Bir kúnde sonsha qap jınadyq. Jigitter munyń bárin qolmen istep jatyr. Súıek taptym, bas súıek, bas súıek taptym. Tús kórmes úshin búgin ishý kerek», — deıdi kran júrgizýshisi óz beınejazbasynda.
Halyqstan Telegram-arnasy jazǵandaı, bir ǵasyrdan astam ýaqyt buryn bul jerde hrıstıan zıraty bolǵan. Keıinirek munda jas natýralıser stansıasy jumys istegen. Bul aýmaqta súıekter buryn da tabylǵan.
Soltústik Qazaqstan oblysy polısıa departamenti «Kýrsıvke» polısıa tekserý bastaǵanyn habarlady.
«Skelettelgen súıekter tabylǵan fakti boıynsha polısıa materıal tirkedi. Qylmystyq sıpat belgileri anyqtalǵan joq. Súıekterdiń shyǵý tegin jáne tabylýynyń ózge de mán-jaılaryn anyqtaý úshin tekserý taǵaıyndaldy. Túpkilikti qorytyndy onyń nátıjeleri boıynsha jasalady», — dedi polısıada.
Buǵan deıin Petropavlda eski zırat ornynda qurylys kezinde adam súıekteri tabylǵany habarlanǵan.