Petropavlda TikTok paıdalanýshysy jol-kólik oqıǵasy týraly jalǵan aqparat taratqany úshin ákimshilik jaýapkershilikke tartyldy, dep habarlaıdy infohub.kz saıty.
Soltústik Qazaqstan oblysy sottarynyń resmı Telegram-arnasynda habarlanǵandaı, Petropavldyń mamandandyrylǵan ákimshilik quqyq buzýshylyqtar jónindegi soty jol-kólik oqıǵasy týraly aqparaty rastalmaǵan TikTok paıdalanýshysyna qatysty isti qarady.
Anyqtalǵandaı, bıylǵy jyldyń tamyz aıynda ol óziniń paraqshasynda júrgizýshi velosıpedshini qaǵyp ketkeni, onyń aýyr jaraqat alǵany, jedel járdem kóliginde jatqany jáne ózdiginen qozǵala almaıtyny týraly aqparat jarıalaǵan.
Bul aqparat shyndyqqa sáıkes kelmeıtini anyqtaldy. Velosıpedshige oqıǵa ornynda medısınalyq kómek kórsetilgen, odan keıin ony aýrýhanaǵa jatqyzý qajet bolmaǵan. Sonymen qatar, oǵan qatysty jol qozǵalysy erejelerin buzǵany úshin ákimshilik quqyq buzýshylyq týraly hattama toltyrylǵan.
Aqparattyń rastyǵyna kúmán keltiretin derekter ákimshilik quqyq buzýshylyq týraly hattamamen, aryzben jáne oqıǵaǵa qatysýshynyń túsiniktemesimen, sondaı-aq beınejazbamen rastalǵan.
Paıdalanýshy óz kinásin moıyndap, dáleldemelerdi daýlamaǵan.
Sot qaýlysymen ol Qazaqstan Respýblıkasy Ákimshilik quqyq buzýshylyq týraly kodeksiniń 456-2-babynyń 3-bóliginde kózdelgen ákimshilik quqyq buzýshylyqty jasaǵany úshin kináli dep tanylyp, oǵan 20 AEK (86 500 teńge) mólsherinde aıyppul salý túrindegi jaza taǵaıyndaldy.
Qaýly zańdy kúshine engen joq.