Petropavlda Esil ózenine jaqyn ornalasqandyqtan turaqty túrde sý tasqynyna ushyraıtyn «Zarechnyı» shaǵyn aýdanynyń turǵyndaryn kezeń-kezeńimen kóshirý bastaldy. Bolashaqta aýdandy turǵyn úı qurylysynan tolyq bosatý josparlanýda, dep habarlaıdy infohub.kz saıty.
Alǵashqylardyń biri bolyp «Zarechnyıde» 30 jyldan astam turǵan 72 jastaǵy Evgenıa Shelýtkova jańa baspana aldy. Endi ol jańa eki bólmeli páterge kóshedi.
«Osyndaı ýaıym-qaıǵy, aldyn ala alańdaısyń: sý qandaı bolady, ne bolady, qalaı basady. Árıne, kóktemdi asyǵa kútemiz. Endi bul bizge qatysty bolmaıdy. Endi tynysh ómir súremiz», — dedi Petropavl turǵyny Evgenıa Shelýtkova.
Kóshiriletinder úshin ekinshi kópqabatty úı salyndy. 90 páterge arnalǵan birinshi úı byltyr paıdalanýǵa berilgen edi. Endi taǵy 72 otbasy jańa baspana alady.
Aýdannyń taǵy bir turǵyny Ýazıpa Ývaısova «Zarechnyıde» 2017 jáne 2024 jyldary qatty sý tasqyny bolǵanyn atap ótti. Onyń aıtýynsha, jyl saıyn kóktemde turǵyndar sýdyń kóterilýin alańdaýshylyqpen kútetin.
Shaǵyn aýdanda barlyǵy 266 otbasy turady. Onyń onnan sál astamy kóshýden bas tartty. Proses kezeń-kezeńimen júrip jatyr, aldaǵy ýaqytta bılik taǵy bir turǵyn úı qurylysyn bastaýdy josparlap otyr.
Petropavl ákimi Serik Muhamedıev jeke úıler men barakalardy kóshirýden keıin buzatynyn habarlady. Úsh qabatty úılerdi shamamen bir-eki jylǵa qaldyrý josparlanýda.
«Ázirge bul úılerdi qatty muqtaj adamdarǵa ýaqytsha baspana retinde beremiz, olar qarajat jınaı alady. Biraq jalpy kentti birtindep bosatamyz», — dedi Muhamedıev.
«Zarechnyı» shaǵyn aýdany Petropavldyń shetinde Esil ózeniniń boıynda ornalasqan. Turǵyn úı jáne áleýmettik nysandardan basqa, onda túzeý mekemesi bar. Bolashaqta kolonıany da basqa jerge kóshirý josparlanýda.