Olympic.kz málimetinshe, 27 shilde men 16 tamyz aralyǵynda Astanadaǵy Ulttyq tenıs ortalyǵynyń ashyq hard korttarynda ATP Challenger Tour (ATR serıasy) men World Tennis Tour (Álemdik tenıs týry) jarystaryn biriktiretin halyqaralyq tenıs týrnırleriniń serıasy – Prezıdent kýbogy ótedi, dep habarlaıdy infohub.kz.
27 shilde men 9 tamyz aralyǵynda World Tennis Tour-dyń W15 (áıelder) jáne M15 (erler) sanatty týrnırleri ótedi. Kelesi kúni, 10 tamyzda, ATP Challenger 50 jáne taǵy bir World Tennis Tour W15 týrnıri bastalady.
Bıyl Qazaqstan atynan Ámir Omarhanov, Zańǵar Nurlanuly, Damır Jalǵasbaı, Arýjan Saǵandyqova, Asyljan Arystanbekova, İnkár Dúsebaı, Sandýǵash Kenjıbaeva jáne Albına Kakenova synǵa túsedi.
Prezıdent kýbogy Qazaqstanda 1991 jyldan beri ótkizilip keledi, al halyqaralyq mártebe týrnırlerge 2007 jyly berildi.
Ótken jyldardaǵy jeńimpazdar qatarynda – qazaqstandyqtar Mıhaıl Kýkýshkın men Andreı Golýbev, ýkraındyq Ilá Marchenko, aýstrıalyq Sebastán Offner, qazirgi Germanıa quramasynyń kapıtany Raıner Shýttler, horvat Ivan Dodıg (juptyq synda Australian Open jáne Roland Garros chempıony), qytaılyq Chjan Shýaı (juptyq synda «Úlken shlem» týrnırleriniń eki dúrkin chempıony) jáne basqalar bar.