2026 jylǵy 28 tamyzdan bastap qazaqstandyqtardyń bir bóligi memlekettik turǵyn úı qorynan turǵyn úıdi qaıta prıvatızasıalaý quqyǵyna ıe bolady. Jańa erejeler buǵan deıin prıvatızasıaǵa qatysqan azamattarǵa qatysty, biraq belgili bir sharttar saqtalǵan jaǵdaıda, dep habarlaıdy infohub.kz saıty.
Atap aıtqanda, alǵashqy turǵyn úı 2024 jyldyń jeltoqsanyna deıin prıvatızasıalanǵan bolýy kerek, al azamattyń mundaı páterdegi nemese úıdegi úlesi 50 paıyzdan aspaýy tıis. Qalǵan qazaqstandyqtar úshin burynǵy ereje saqtalady – memlekettik turǵyn úıdi prıvatızasıalaý quqyǵyn tek bir ret paıdalanýǵa bolady.
Taǵy bir ózgeris memlekettik páterlerdi satyp alý sharttaryna qatysty. Qazaqstandyqtar turǵyn úıdi 15 jylǵa deıin merzimge bólip tóleý arqyly prıvatızasıalaı alady.
Almaty.tv-ge bergen túsindirmesinde Turǵyn úı qatynastary basqarmasynyń basshysy Ásem Áljanova Qazaqstanda memlekettik turǵyn úıdi prıvatızasıalaýdyń úsh mehanızmi qarastyrylǵanyn aıtty.
Zańnamada belgilengen azamattardyń jekelegen sanattary páterdi tegin ala alady. Ekinshi nusqa turǵyn úıdi qaldyq quny boıynsha tolyq satyp alýdy kózdeıdi. Úshinshisi páter qunyn birtindep – 15 jylǵa deıingi merzimde aı saıynǵy tólemdermen tóleýge múmkindik beredi.
Sonymen qatar, prıvatızasıa azamattyń mindeti emes, quqyǵy bolyp tabylady. Oǵan qolaıly ýaqytta júginýge bolady. Tegin prıvatızasıa múmkindigi «Turǵyn úı qatynastary týraly» Zańnyń 13-babynda aıqyndalǵan qazaqstandyqtardyń jekelegen sanattary úshin qarastyrylǵan.
Áljanovanyń aıtýynsha, olardyń qatarynda I jáne II toptaǵy múgedektigi bar adamdar, Semeı ıadrolyq polıgonyndaǵy synaqtardyń saldarynan zardap shekkender týraly kýáligi bar azamattar, Aral óńiriniń turǵyndary jáne zańnamada kózdelgen basqa da sanattar bar.
Prıvatızasıaǵa qujattardy onlaın da, qaǵaz túrinde de tapsyrýǵa bolady. Elektrondyq ótinishter eGov portaly arqyly, qaǵaz túrindegiler – HQO bólimshelerinde qabyldanady.